दाङको समृद्धिका लागि दीर्घकालीन एजेण्डासहित महासचिव पोखरेल चुनावी मैदानमा
दाङ । नेकपा एमालेका महासचिव तथा दाङ क्षेत्र नम्बर २ का प्रतिनिधिसभा सदस्यका उम्मेदवार शङ्कर पोखरेलले आगामी निर्वाचनका लागि दाङको समग्र विकासलाई केन्द्रमा राख्दै आफ्ना चुनावी एजेण्डा सार्वजनिक गरेका छ ।
दाङलाई लुम्बिनी प्रदेशको राजधानी बनाउने वाचा पूरा गरेको स्मरण गराउँदै पोखरेलले आफू संस्थापक मुख्यमन्त्रीका रूपमा संघीयता कार्यान्वयनको नेतृत्व गर्दै दाङको पूर्वाधार विकासको आधार तयार गर्न भूमिका खेलेको दाबी गरेका छन् ।
उनले पानीमुनीको पुल भएको जिल्लाको पहिचान बदल्ने कामदेखि प्रमुख अस्पतालहरूलाई रिफर सेन्टरबाट विशेषज्ञ सेवा दिने स्तरसम्म पुर्याउन सहजीकरण गरेको उल्लेख गरे ।
साथै, उच्च प्राविधिक शिक्षाको आधारशीला तयार गर्न र राजनीतिमा इमान्दार तथा स्वच्छ छविका रूपमा आफूलाई स्थापित गर्न सफल भएको उनको भनाइ छ ।
पोखरेलले अवसर पाउँदा दाङवासीको गौरव बढाउने काम गरेको र पराजय व्यहोर्दा पनि जिल्लाको सेवामा निरन्तर समर्पित रहेको उल्लेख गर्दै अब राष्ट्रको नेतृत्वकारी भूमिकामा दाङलाई पुर्याउने समय आएको बताए ।
उनले दाङमा सुरु भएका महत्वपूर्ण योजनाहरू पूरा गर्ने र नयाँ योजनाहरू अघि बढाउने प्रतिबद्धता व्यक्त गर्दै ‘अब ज्ञापनपत्र बोकेर हिँड्ने होइन, बुझ्ने, निर्णय गर्ने र कार्यान्वयन गर्ने दाङ बनाउने’ संकल्प व्यक्त गरे ।
प्रमुख प्रतिबद्धताहरू
पोखरेलले सार्वजनिक गर्नुभएको एजेण्डामा लमही–घोराही–तुल्सीपुर फोरलेन सडक निर्माण सम्पन्न गर्ने, ३५० बिघा क्षेत्रफलको घोराही औद्योगिक क्षेत्र निर्माण गर्ने, राप्ती स्वास्थ्य विज्ञान प्रतिष्ठानअन्तर्गत ४०० बेडको नयाँ अस्पताल भवन निर्माण गर्ने विषय समेटिएको छ ।
त्यसैगरी मेडिकल कलेजका लागि आवश्यक पूर्वाधार निर्माण, त्रिभुवन विश्वविद्यालयअन्तर्गत प्रादेशिक इन्जिनियरिङ कलेज सञ्चालन, गुहारखोला हाइड्याम तथा नहर प्रणाली विकास, तुल्सीपुर विमानस्थल विस्तार गरी ७२ सिटे जहाज उडान–अवतरण योग्य बनाउने योजना पनि उहाँका प्राथमिकतामा छन् ।
ग्रामीण सडक कालोपत्रे, शहरी क्षेत्रमा व्यवस्थित फुटपाथ निर्माण, सामुदायिक विद्यालयको गुणस्तर सुधार, स्वास्थ्य बीमाको दायरा विस्तार, कृषिको आधुनिकीकरण र व्यवसायीकरण, युवाका लागि विनाधितो सहुलियत ऋण, नयाँ लगानीकर्तालाई आयकर छुट तथा सिचाइ सुविधा विस्तार गर्ने योजना पनि प्रतिबद्धतामा समावेश गरिएको छ ।
यसैगरी घोराही–वंगलाचुली खानी क्षेत्र जाने सडक ढलान गर्ने, प्रदेश राजधानीको गुरु योजना कार्यान्वयन गर्ने र केन्द्रीय घोषणापत्रका प्रतिबद्धता पूरा गर्न नेतृत्वकारी भूमिका खेल्ने पोखरेलको भनाइ छ ।
उहाँले दाङको विकास र दाङवासीको सम्मानलाई मूल मन्त्र बनाउँदै सूर्य चिन्हमा मतदान गरी आफूलाई विजयी गराउन मतदातासँग आग्रह गर्नुभएको छ ।
मेरा प्रमुख प्रतिवद्धताहरू
लमही–घोराही–तुल्सीपुर फोरलेन सडक निर्माण सम्पन्न गर्ने ।
३५० बिघा क्षेत्रफलको घोराही औद्योगिक क्षेत्र निर्माण गर्ने ।
राप्ती स्वास्थ्य विज्ञान प्रतिष्ठानको ४०० बेडको नयाँ अस्पताल भवन निर्माण गर्ने ।
मेडिकल कलेजका लागि आवश्यक सम्पूर्ण पूर्वाधार निर्माण गर्ने ।
त्रिवि अन्तर्गत प्रादेशिक इन्जिनियरिङ कलेज सञ्चालन गर्ने ।
गुहारखोला हाइड्याम र नहर प्रणाली विकास गर्ने ।
७२ सिटे जहाज उडान/अवतरण गर्ने गरी तुल्सीपुर विमानस्थलको विस्तार गर्ने ।
प्रमुख बस्तीका ग्रामीण सडक कालोपत्रे गर्ने ।
शहरी क्षेत्रमा व्यवस्थित फुटपाथ निर्माण गर्ने ।
सामुदायिक विद्यालयको गुणस्तर सुधार र विद्यार्थी संख्या वृद्धि गर्ने ।
स्वास्थ्य बीमाको दायरा विस्तार र सेवाको सुनिश्चितता गर्ने ।
कृषिको आधुनिकीकरण र व्यवसायीकरण गरी किसानको जीवनस्तर उठाउने ।
उद्यमी वन्न चाहने युवाका लागि विनाधितो सहुलियतपूर्ण ऋणको व्यवस्था गर्ने ।
नयाँ लगानीकर्तालाई निश्चित अवधिसम्म आयकर छुटको व्यवस्था गर्ने ।
सम्भाव्य खोला–स्रोतमा कृत्रिम जलाशय निर्माण गरी सिचाइ सुविधा विस्तार गर्ने।
घोराहीदेखि वंगलाचुलीको खानी क्षेत्रजाने सडकलाई ढलान सड़क बनाउने।
प्रदेश राजधानिको गुरु योजना कार्यान्वयन गर्ने।
केन्द्रीय घोषणापत्रका प्रतिवद्धता पुरा गर्न नेतृत्वकारी भूमिका खेल्ने ।
