महेश बस्नेतलाई सम्बाेधन गर्दै अखिल क्रान्तिकारी अध्यक्षले लेखे आक्रोशपूर्ण स्टाटस
“प्रिय दाइ महेश बस्नेत, तपाईँलाई दाङबाट सम्झना छ, एकदिन तह लगाउनु पर्छ, एक एक हिसाब राख्नुहोला”
दाङ । दाङमा नेकपा (एमाले) को चुनाव चिन्ह जलाइएको घटनापछि राजनीतिक वृत्त तरङ्गित बनेकाे छ । यही सन्दर्भमा नेकपा (एमाले) सँग वैचारिक रूपमा फरक धारमा रहेको बताउँदै अखिल क्रान्तिकारी दाङका अध्यक्ष गाेविन्द मल्लले सामाजिक सञ्जालमार्फत् आक्रोशपूर्ण स्टाटस सार्वजनिक गरेका छन् ।
उक्त स्टाटसमा उनले तुलसीपुरमा एमालेको चुनाव चिन्ह जलाइएको घटनालाई उल्लेख गर्दै घटनाप्रति आक्राेश व्यक्त गरेका छन् । उनले केही व्यक्तिलाई लक्षित गर्दै कडा शब्द प्रयोग गरेका छन् भने भीडमा अराजक गतिविधि भएको दाबी गरेका छन् ।
स्टाटसमा उनले “हिजो संसद आगो लगाउने, सिंहदरबार जलाउने, अदालत खरानी बनाउने, राजनीतिक पार्टीका कार्यालय तथा नेता–कार्यकर्ताका घर जलाउनेहरू अहिले होहल्ला गरिरहेका छन्” भन्ने अभिव्यक्ति पनि दिएका छन् । साथै, आगामी केही महिना यस्तै गतिविधि बढ्न सक्ने दाबीसमेत गरेका छन् ।
त्यसैगरी, उनले एमाले नेता महेश बस्नेतलाई सम्झिँदै दाङबाट “स्मरण” पठाएको उल्लेख गरेका छन् र केही व्यक्तिहरूसँग “हिसाब राख्नुपर्ने” आशय व्यक्त गरेका छन् ।
उक्त स्टाटस सार्वजनिक भएपछि सामाजिक सञ्जालमा समर्थन र विरोध दुवै प्रतिक्रिया देखिएको छ । यद्यपि, आरोप लगाइएका विषयहरू सम्बन्धित निकायबाट पुष्टि भएका छैनन् ।
दाङमा चुनावी गतिविधि तीव्र भइरहेका बेला विभिन्न पक्षबाट आउने यस्ता अभिव्यक्तिले राजनीतिक माहोल थप तातेको देखिन्छ ।
