पश्चिमी न्यून चापीय प्रणाली सक्रिय : यी प्रदेशमा वर्षा–हिमपातको सम्भावना
दाङ । पश्चिमी न्यून चापीय प्रणालीको आंशिक प्रभावका कारण नेपालका पहाडी र हिमाली क्षेत्रको मौसम बदली हुने क्रम बढेको छ ।
मौसम पूर्वानुमान महाशाखाका अनुसार यस प्रणालीका कारण देशका विभिन्न भूभागमा वर्षा तथा हिमपातको सम्भावना देखिएको छ ।
महाशाखाका अनुसार आज दिउँसो लुम्बिनी, कर्णाली र सुदूरपश्चिम प्रदेशसहित अधिकांश पहाडी तथा हिमाली भूभागमा सामान्यदेखि मध्यम बादल लाग्नेछ भने अन्य भूभागमा आंशिक बदली रहनेछ । विशेषगरी हिमाली क्षेत्रका केही स्थानमा चट्याङ्गसहित मध्यम वर्षा र हिमपात हुन सक्ने सम्भावना रहेको छ ।
यस्तै कोशी, लुम्बिनी, कर्णाली र सुदूरपश्चिम प्रदेशका पहाडी क्षेत्रमा केही स्थानमा चट्याङ्गसहित मध्यम वर्षा हुन सक्ने महाशाखाले जनाएको छ । अन्य प्रदेशका पहाडी भूभागका थोरै स्थानमा पनि वर्षाको सम्भावना रहेको छ ।
तराई क्षेत्र पनि मौसमीय प्रभावबाट पूर्ण रूपमा अछुतो रहने छैन। लुम्बिनी र सुदूरपश्चिम प्रदेशका तराईका एक–दुई स्थानमा चट्याङ्गसहित वर्षा हुन सक्ने पूर्वानुमान गरिएको छ ।
आज राति पनि देशका पहाडी र हिमाली क्षेत्रमा सामान्य बदली रहनेछ भने बाँकी भूभागमा आंशिक बदली रहने मौसमविद्ले बताएका छन् ।
हिमाली क्षेत्रमा पुनः वर्षा र हिमपातको सम्भावना रहँदा कोशी, कर्णाली र सुदूरपश्चिम प्रदेशका पहाडी क्षेत्रमा चट्याङ्गसहित वर्षा हुन सक्ने अनुमान गरिएको छ ।
मौसमविद्हरूका अनुसार पश्चिमी न्यून चापीय प्रणाली सक्रिय रहँदा विशेषगरी पहाडी र हिमाली क्षेत्रमा मौसम अस्थिर हुने भएकाले आवश्यक सावधानी अपनाउन आग्रह गरिएको छ । यात्रु, किसान तथा हिमाली क्षेत्रमा आवतजावत गर्नेहरूलाई मौसमको अद्यावधिक जानकारी लिएर मात्रै यात्रा गर्न सुझाव दिइएको छ ।
