रसुवा बाढीका बेपत्ताको पहिचानमा कठिनाइ, शिक्षण अस्पतालमा तस्बिर हेर्दै पर्खिंदै आफन्त
काठमाडौं । रसुवामा आएको विनाशकारी बाढीका कारण सम्पर्कविहीन भएका व्यक्तिको पहिचान र खोजीका लागि महाराजगञ्जस्थित त्रिभुवन विश्वविद्यालय शिक्षण अस्पताल (टिचिङ) मा तस्बिर सार्वजनिक गरिएको छ।
बाढीका कारण हालसम्म करिब ५ हजार मानिस सम्पर्कविहीन रहेको तथ्यांक छ। हालसम्म १ हजार ३ सयभन्दा बढी शव फेला परे पनि तीमध्ये ९८ जनाको मात्रै पहिचान खुलेको छ। पहिचान हुन नसकेका शवको सनाखतका लागि अस्पतालले डीएनए परीक्षण प्रक्रिया अघि बढाएको छ। त्यसका लागि बेपत्ताका आफन्तले डीएनए नमुना दिने क्रम जारी छ।
विपद्को १२ दिन बितिसक्दा पनि आफन्तको अवस्थाबारे ठोस जानकारी प्राप्त हुन नसकेपछि अस्पताल धाउने परिवारका सदस्यको संख्या बिस्तारै घट्न थालेको छ। कतिपयको क्षतविक्षत अंग मात्रै फेला परेको छ।
सुरुका दिनमा अस्पताल परिसरमा आफन्तको बाक्लो उपस्थिति र चहलपहल देखिए पनि पछिल्लो समय सो क्रम घट्दै गएको अस्पताल स्रोतले जनाएको छ। अस्पतालमा राख्ने स्थान नहुँदा चितवन, कास्की, काठमाडौंलगायत विभिन्न जिल्लामा शवलाई जमिनमुनि अस्थायी रूपमा व्यवस्थापन गरिएको छ।
–न्युज एजेन्सी नेपाल
