कोरोनाले बन्द भएको भीरकोटकाे साप्ताहिक हाटबजार पुनः सञ्चालनमा
काठमाडौँ । स्याङ्जाको भीरकोट नगरपालिकामा साप्ताहिक हाटबजार पुन सुचारु भएको छ । कोभिड १९ को महामारीका कारण बन्द भएको पालिकाकाे साप्ताहिक हाट बजार हिजा (शनिवार)देखि पुन सुचारु भएको हो ।
नगरपालिकाको वडा नम्बर १ को फर्दवासमा अवस्थित हाट बजारलाई शनिबार सांकेतिक रूपमा पुनस् उद्घाटन गर्दै नगर प्रमुख गोविन्द कुमार कर्माचार्यले हरेक शनिवार हाटबजार नियमित रूपमा सञ्चालन गर्न लागिएको जानकारी दिए ।
भीरकोटमा उत्पादित कृषि उपजहरूको बजारीकरण गर्ने उद्देश्यले हाटबजार सुचारू गर्न लागिएको बताउँदै कृषक र उद्योग वाणिज्य संघ, भीरकोटलाई पनिआग्रह गरेका थिए ।
पालिकाका कृषि संयोजक एवम् नगर प्रवक्ता दिपेन्द्र केसीले किसानहरूको गुनासो सम्बोधन गर्न पालिकाले हाटबजार सुचारू गरेको बताए ।
हाट बजार हरेक शनिबार १० देखि ५ बजेसम्म संचालन हुने र कृषकले विक्री वितरण गर्न नसकेको कृषि उपजको जिम्मा नगरपालिकाले लिने बताइएको छ।
नगरपालिकाले कृषकहरूलाई तालिम, बिउबिजन र प्रविधिमा सहुलियत र अनुदान दिएकाले त्यसलाई उपलब्धिमूलक बनाउन र कृषकहरूको व्यवसायिक हितको लागि नगरपालिकाले काम गरिरहेको प्रवक्ता केसीले बताए ।
