स्याङ्जाको आँधिखोलामा पौडिने क्रममा बेपत्ता पोख्रेल मृत फेला

काठमाडौँ । स्याङ्जाको आँधिखोलामा पौडी खेल्ने क्रममा डुबेर बेपत्ता भएका वालिङ बहुमुखी क्याम्पसका विद्यार्थी शिव पोख्रेल मृत फेला परेका छन् ।

पोख्रेल शुक्रबार दिउँसो साथीहरूसँग वालिङ् वडा नम्बर ११ अमले स्थित आँधिखोलामा पौडी खेल्ने क्रममा डुबेर बेपत्ता भएका थिए।

खोजतलास गर्ने क्रममा हिजो (शनिबार)वालिङ् वडा नम्बर १३ र गल्याङ वडा नम्बरको ८ सिमाना बायाँटारी स्थित आँधिखोला किनारमा शव फेला परेको जिल्ला प्रहरी कार्यालय स्याङ्जाका प्रवक्ता एवं सूचना अधिकारी प्रहरी नायब उपरीक्षक इन्द्रबहादुर रानाले जानकारी दिए ।

हरिनास गाउँपालिका वडा नम्बर ५ बसन्त डाँडा घर भई वालिङ् नगरपालिका वडा नम्बर ५ बिपी चोकमा डेरा गरी बस्ने २३ वर्षीय शिव पोख्रेल वालिङ् बहुमुखी क्याम्पसमा व्यवस्थापन संकायको स्नातक तह तेस्रो वर्षमा अध्ययनरत थिए।