राष्ट्रपति पौडेलद्वारा शीतल निवासमा नवकन्या पूजन
काठमाडौं । राष्ट्रपति रामचन्द्र पौडेलले बडादशैंका अवसरमा नवदुर्गाका अवतारका रूपमा नौ जना कन्याको विधिपूर्वक पूजाअर्चना गरेका छन्।
राष्ट्रपति भवन शीतल निवासमा मंगलबार आयोजित विशेष धार्मिक अनुष्ठानमा राष्ट्रपति पौडेल र प्रथम महिला सविता पौडेलले परम्परागत विधिअनुसार नवकन्याको गोडा धोएर टीका लगाइदिएका थिए। उनीहरूले कन्याहरूलाई दक्षिणा तथा उपहारसमेत प्रदान गरेका थिए।
नेपालीहरूको महान् चाड बडादशैंका अवसरमा राष्ट्रप्रमुखबाट नवदुर्गास्वरूप नवकन्याको पूजाअर्चना गर्ने परम्परा रहिआएको छ। सोही ऐतिहासिक तथा सांस्कृतिक परम्परालाई निरन्तरता दिँदै राष्ट्रपति भवनमा वैदिक विधिपूर्वक कन्या पूजन गरिएको हो।
दुर्गा भवानीका नौ स्वरूप शैलपुत्री, ब्रह्मचारिणी, चन्द्रघण्टा, कुष्माण्डा, स्कन्दमाता, कात्यायनी, कालरात्रि, महागौरी र सिद्धिदात्रीको प्रतीकका रूपमा नौ जना कन्याको पूजा गर्ने धार्मिक मान्यता छ।
पूजाका क्रममा राष्ट्रपति पौडेल र प्रथम महिला पौडेलले कन्याहरूको गोडा जलले धोएर निधारमा रातो टीका तथा जमरा लगाइदिएका थिए। उनीहरूले कन्याहरूलाई वस्त्र, फलफूल र दक्षिणासमेत प्रदान गरेका थिए।
हिन्दू धार्मिक मान्यताअनुसार नवरात्रमा बालिकालाई देवीशक्तिको प्रतीक मानेर पूजा गर्ने परम्परा छ। यस्तो पूजाले मुलुकमा सुख, शान्ति र समृद्धि कायम हुने तथा दैवी शक्तिको प्रभाव स्थापित हुने धार्मिक विश्वास रहिआएको छ।
सो अवसरमा पुरोहितहरूले स्वस्तिवाचन गर्नुका साथै दुर्गा सप्तशती (चण्डी) का मन्त्रहरू पाठ गरेका थिए। घटस्थापनादेखि सुरु हुने दशैंका धार्मिक अनुष्ठानमा शक्तिपीठ तथा घरघरमा गरिने कन्या पूजालाई महत्त्वपूर्ण कृत्यका रूपमा लिइन्छ।
