सुनचाँदी बजार ओरालो: तोलामा ३,५०० ले घट्यो सुनको मूल्य
काठमाडौँ । अन्तरराष्ट्रिय बजारमा सुनको मूल्यमा आएको गिरावटसँगै नेपाली बजारमा पनि सुनको मूल्यमा उल्लेखनीय कमी आएको छ । नेपाल सुनचाँदी व्यवसायी महासङ्घका अनुसार आज सुनको मूल्य तोलामा रु ३,५०० ले घटेर रु १,८१,८०० मा कायम भएको छ।
यसअघि बुधबार तोलाको मूल्य रु १,८५,३०० रहेको थियो । यस्तै, चाँदीको मूल्यमा पनि गिरावट आएको छ। आज चाँदी प्रतितोला रु ३५ ले घटेर रु १,९२५ मा कारोबार भइरहेको महासङ्घले जनाएको छ । बुधबार प्रतितोला चाँदी रु १,९६० मा कारोबार भएको थियो ।
सुनचाँदी व्यवसायीहरूका अनुसार अन्तरराष्ट्रिय बजारमा सुनको मूल्य घटेर एक औँस रु ३,१६० अमेरिकी डलरमा कारोबार भइरहेको अन्तरराष्ट्रिय सञ्चारमाध्यमहरूले जनाएका छन् ।
व्यवसायीहरूले सुनचाँदीको मूल्यमा आएको गिरावटलाई विश्वबजारमा देखिएको आर्थिक अस्थिरता, डलरको मूल्य तथा लगानीकर्ताको धारणा परिवर्तनसँग जोडेर हेरेका छन् ।
