बाजुराको जिप दुर्घटनामा तीन जनाको मृत्यु, दुई घाइते
बाजुरा । बाजुराको जगन्नाथ गाउँपालिकामा सोमबार दिउँसो जिप दुर्घटना हुँदा तीन जनाको घटनास्थलमै मृत्यु भएको छ भने दुई जना घाइते भएका छन् । नेपाल टेलिकमको टावरमा सोलार प्यानल जडानका लागि गइरहेको जिप पिलुचौरमा दुर्घटना भएको हो ।
जिल्ला प्रहरी कार्यालय बाजुराका अनुसार मृतकमध्ये ५५ वर्षिय लोकबहादुर खड्का नेपाल टेलिकम बाजुरा कार्यालयका प्रमुख हुन् । उनी धनगढी उपमहानगरपालिकाका स्थायी बासिन्दा हुन् । अन्य मृतकहरूमा ४० वर्षीय जिप चालक करन महतरा र बडीमालिका नगरपालिका–७ निवासी २८ वर्षीय रवीन्द्र धामी रहेका छन् ।
जिप दुर्घटनामा घाइते भएका दुई जनाको कोल्टीस्थित आधारभूत अस्पतालमा उपचार भइरहेको छ । उनीहरूको अवस्था मध्यम रहेको प्रहरीको प्रारम्भिक जानकारीमा उल्लेख छ ।
नेपाल टेलिकमको पिलुचौरस्थित टावरमा सोलार प्यानल जडान गर्न प्राविधिक टोली लिएर गएको बा१झ २३४५ नम्बरको जिप सडकबाट झन्डै ३० मिटर तल खसेको जनाइएको छ ।
जिप अनियन्त्रित भई भीरबाट खस्दा यात्रुहरू उछिट्टिएका थिए । घटनास्थलमै तीन जनाको ज्यान गएको पुष्टि जिल्ला प्रहरी कार्यालय बाजुराले गरेको छ ।
दुर्घटनाको खबर पाएपछि प्रहरीको टोली घटनास्थलमा पुगेको थियो । स्थानीयवासी र सुरक्षाकर्मीको सहकार्यमा घाइतेहरूलाई उद्धार गरी अस्पताल पुर्याइएको हो ।
घटनाबारे थप अनुसन्धान भइरहेको प्रहरी स्रोतले जनाएको छ । सडक अवस्था कमजोर र सँकुचित भएको तथा गाडीको ब्रेक फेल भएको प्रारम्भिक अनुमान गरिएको छ ।
प्रमुख खड्काको असामयिक निधनले नेपाल टेलिकम परिवारमा शोकको वातावरण छाएको छ । संस्थाका अन्य अधिकारीहरूले खड्काको कार्यक्षमता र समर्पणको स्मरण गर्दै श्रद्धाञ्जली अर्पण गरेका छन् ।
