सुनचाँदीको मूल्यमा गिरावट : सुन प्रतिताेला २५ सय र चाँदी ५ रुपैयाँले घट्यो
काठमाडौँ । नेपाली बजारमा मंगलबार सुनचाँदीको मूल्यमा गिरावट आएको छ। नेपाल सुनचाँदी व्यवसायी महासंघका अनुसार आज सुनको मूल्य प्रतितोला २५ सय रुपैयाँले घटेको छ ।
महासंघले सार्वजनिक गरेको जानकारीअनुसार आज छापावाला सुनको मूल्य प्रतितोला १ लाख ९५ हजार रुपैयाँ निर्धारण गरिएको छ। अघिल्लो दिन अर्थात् सोमबार यो मूल्य १ लाख ९७ हजार ५ सय रुपैयाँ थियो। सोमबार सुनको मूल्य स्थिर थियो भने आजको गिरावटले उपभोक्तालाई केही राहत दिएको अनुमान गरिएको छ।
त्यस्तै, आज चाँदीको मूल्यमा पनि गिरावट आएको छ। प्रतितोला ५ रुपैयाँले घट्दै चाँदी २ हजार १६० रुपैयाँमा कारोबार भइरहेको महासंघले जनाएको छ।
सुनचाँदीको मूल्य अन्तर्राष्ट्रिय बजारको उतारचढाव, डलरको भाउ, माग र आपूर्तिको अवस्थाले निर्धारण हुने गर्दछ। पछिल्ला दिनहरूमा अन्तर्राष्ट्रिय बजारमा सुनको मूल्यमा केही घटबढ देखिएको छ, जसको असर नेपाली बजारमा पनि परेको देखिन्छ।
महासंघले दैनिक रूपमा अन्तर्राष्ट्रिय मूल्य तथा स्थानीय बजारको अवस्था विश्लेषण गरी मूल्य निर्धारण गर्दै आएको छ।
