तरलता चाप कम गर्दै राष्ट्र बैंक : ९० अर्ब निक्षेप संकलन, ३५ दिनको अवधि तोकियो
काठमाडौँ । बैंकिङ प्रणालीमा अत्यधिक तरलता देखिएपछि नेपाल राष्ट्र बैंकले बुधबार ९० अर्ब रुपैयाँ निक्षेप संकलन गर्ने घोषणा गरेको छ । राष्ट्र बैंकले यो रकम ३५ दिनका लागि संकलन गर्न लागेको हो ।
बोलकबोल प्रणालीमार्फत संकलन गरिने उक्त निक्षेपको अवधि २०८२ साउन ७ गतेसम्म रहनेछ । सो मितिमा राष्ट्र बैंकले निक्षेपको साँवा तथा ब्याज दुवै भुक्तानी गर्ने जानकारी दिएको छ ।
राष्ट्र बैंकका अनुसार निक्षेप संकलनको यस प्रक्रियामा “क”, “ख” र “ग” वर्गका बैंक तथा वित्तीय संस्थाहरू मात्र सहभागी हुन पाउने छन् । यस कदमलाई राष्ट्र बैंकले बजारमा सन्तुलन कायम गर्ने मौद्रिक उपकरणको रूपमा उपयोग गर्दै आएको हो ।
विगत केही सातायता बैंक तथा वित्तीय संस्थाहरूमा तरलता प्रशस्त रहेको अवस्थामा, यसले ब्याजदरमा अनावश्यक दबाव सिर्जना गर्ने जोखिम देखिएको थियो । त्यसैले राष्ट्र बैंकले समयमै हस्तक्षेप गर्दै मौद्रिक व्यवस्थापनलाई सुदृढ बनाउने उद्देश्यले यो कदम चालेको हो ।
बोलकबोलका लागि इच्छुक बैंक तथा वित्तीय संस्थाहरूले निर्धारित समयसीमाभित्र दरखास्त दिनुपर्नेछ । यो उपायले बैंकहरूलाई थप सचेत र जिम्मेवार बनाउने वित्तीय विश्लेषकहरूको ठम्याइ छ ।
