लगातारको वृद्धि पछि सुनचाँदीको मूल्यमा गिरावट
काठमाडौँ । पछिल्ला केही दिनदेखि उच्च उकालो लागेको सुनचाँदीको मूल्यमा बिहीबारदेखि घट्दो ट्रेन्ड देखिएको छ। नेपाली बजारमा आज (शुक्रबार) सुन तोलामा रु ८०० र चाँदी रु ५० ले सस्तो भएको छ।
नेपाल सुनचाँदी व्यवसायी महासङ्घका अनुसार आज छापावाला सुनको मूल्य प्रतितोला रु १,९४,७०० निर्धारण गरिएको छ। त्यस्तै चाँदी प्रतितोला रु २,१५० मा कारोबार भइरहेको छ।
यसअघि, बिहीबार सुनको मूल्य रु १,९५,५०० र चाँदीको मूल्य रु २,२०० रहेको थियो। त्यो भन्दा अघिल्लो दिन अर्थात् बुधबारको तुलनामा बिहीबार पनि सुन रु ४०० र चाँदी रु २५ ले घटेको थियो। यसरी हेर्दा दुई दिनमै सुन रु १,२०० र चाँदी रु ७५ ले सस्तो भएको हो।
अन्तर्राष्ट्रिय बजारको प्रभाव
महासङ्घका अनुसार, अन्तर्राष्ट्रिय बजारमा सुनको मूल्य हाल प्रति औँस ३,३०० अमेरिकी डलर आसपासमा कारोबार भइरहेको छ। यही घटबढले नेपाली बजारमा समेत प्रभाव पारिरहेको हो ।
लगातार चुलिएको सुनचाँदीको मूल्यले उपभोक्ता र व्यवसायी दुवैलाई दबाबमा पारेको थियो। आजको गिरावटसँगै केही सन्तुलन आउने आशा गरिएको छ। तर अन्तर्राष्ट्रिय बजारमा भइरहेको उतारचढावका कारण मूल्य फेरि पनि अस्थिर रहने सम्भावना देखिन्छ।
