जाजरकोटको कुशेमा पहिरोको ढुङ्गा लागेर दिदीबहिनीकाे मृत्यु
टहरामा सुतिरहेकै बेलामा ढुङ्गा खसेर मृत्यु
दाङ । जाजरकोटको कुशे गाउँपालिका–३ तर्पेना गाउँमा गएराति ढुङ्गा खसेर लाग्दा एकै परिवारका दुई दिदीबहिनीको मृत्यु भएको छ ।
नियमित वर्षापछि आएको पहिरोसँगै ढुङ्गा खसेर टहरामा सुतिरहेकी १८ वर्षिया शर्मिला बुढा र १४ वर्षिया चमेली बुढाको घटनास्थलमै मृत्यु भएको हो।
दुबै जना भूकम्पपीडितका लागि निर्माण गरिएको अस्थायी टहरामा सुतिरहेका थिए। उनीहरू नरबहादुर बुढाका छोरीहरू हुन्। वडाध्यक्ष वीरबहादुर बुढाका अनुसार, दिदीबहिनीले बाख्रा चराउने काम गर्थे र त्यसकै हेरचाह गर्न टहरामा बसेका थिए।
“लगातारको वर्षाले पहिरो आएको रहेछ, टहरामाथिबाट अचानक ढुङ्गा खस्यो,” वडाध्यक्ष बुढाले भने, “दुवै जनाको घटनास्थलमै मृत्यु भएको छ।”
घटनाको जानकारी पाउनासाथ प्रहरी टोली घटनास्थल पुगेको थियो। घटनाको प्रारम्भिक विवरण संकलन गरिएको प्रहरी जवान महेश सिंहले जानकारी दिए । उनका अनुसार, घटनास्थल दुर्गम र अपायक स्थानमा भएकाले उद्धारमा कठिनाइ भएको थियो।
कुशे गाउँपालिका र स्थानीय प्रशासनले घटनाको विस्तृत विवरण संकलन गर्दै क्षति विवरण तयार पार्ने कार्य सुरु गरिसकेको छ। घटनाले स्थानीयवासी स्तब्ध र शोकमा परेका छन्।
यतिबेला भूकम्पपीडित टहरा अझै पनि असुरक्षित रहेको विषयमा प्रश्न उठेको छ। स्थानीय प्रशासनले पहिरोप्रभावित क्षेत्रमा सर्तकता अपनाउन आग्रह गरेको छ।
