रुपन्देही–३ मा रास्वपाको उम्मेदवार विवाद : उम्मेदवार छनोट प्रक्रिया माथि छानबिन गर्न माग
केन्द्रीय कार्यालयमा आयाेजित पत्रकार भेटघाट तथा अन्तरक्रिया कार्यक्रम एकाएक स्थगित
काठमाडौँ । राष्ट्रिय स्वतन्त्र पार्टी (रास्वपा) ले रुपन्देही–३ का लागि उम्मेदवारका रूपमा डा. लेखजंग थापाको नाम घोषणा गरेको केही घण्टामै पार्टीभित्र प्रश्न उठ्न थालेको छ ।
आइतबार उम्मेदवार घोषणा भएपछि आज दिउँसो २ बजे केन्द्रीय कार्यालय, वनस्थलीमा पत्रकारसँग भेटघाट तथा अन्तरक्रिया गर्ने भनिएका थापाको कार्यक्रम आकस्मिक रूपमा स्थगित भएको छ । प्रवक्ता मनिष झाले विशेष कारणवश उक्त कार्यक्रम अर्को मितिमा सारिएको जानकारी दिएका छन् ।
तर, यसबीच पार्टीका केन्द्रीय सदस्य गणेश कार्कीले उम्मेदवार छनोट प्रक्रियामाथि नै छानबिन आवश्यक भएको टिप्पणी गर्दै विवादलाई थप चासोको केन्द्रमा पुर्याएका छन् ।
उम्मेदवार चयन र तत्कालै उठेका प्रश्न
रास्वपाले उपनिर्वाचनका लागि डा. थापालाई उम्मेदवार घोषणा गरेको १४ घण्टा नबित्दै कार्कीले प्रक्रिया पारदर्शी भए–नभएकोबारे शंका व्यक्त गरेका छन् ।
उनले २०७९ सालको निर्वाचनमा समानुपातिकतर्फको उम्मेदवार छनोट प्रक्रियामा आफूलाई अन्याय भएको स्मरण गर्दै अहिले पनि आन्तरिक प्रणालीमा कमजोरी हुन सक्ने संकेत गरेका छन् ।
कार्कीले सामाजिक सञ्जालमार्फत लेखेका छन्, “यसपटकको उम्मेदवार छनोटमा ठूला त्रुटि भएको ठान्दिनँ, तर केही कमजोरी भने हुनसक्छन् । त्यसैले छानबिन गरेर निष्कर्ष निकाल्न आवश्यक छ ।”
पुरानो विवादको छायाँ
रास्वपाभित्र समानुपातिक सांसद छनोटको विवाद अझै समाधानमा पुग्न सकेको छैन । कार्कीका अनुसार, प्रारम्भमा १२ क्लस्टरमा आन्तरिक चुनावमार्फत परिणाम निकालिएको भए पनि पछि सांसद छनोट गर्दा ६ क्लस्टरमा सीमित गरियो र आफू बाहिर धपाइयो ।
यही असन्तोषले गर्दा उनले अहिलेको उम्मेदवार चयन प्रक्रियालाई पनि विशेष ध्यानपूर्वक नियालेको बताएका छन् । उनको भनाइमा, विवादको निरूपण नहुँदा पार्टीभित्र विश्वासको संकट बढ्ने र नयाँ प्रणाली निर्माणबारे शंका उब्जिने सम्भावना रहन्छ ।
व्यक्तिगत जीवनबारे उठेका टिप्पणी
उम्मेदवार थापाको व्यक्तिगत जीवनबारे समेत पार्टीभित्र चर्चा सुरु भएको छ । कार्कीले थापाले पहिलेकी श्रीमतीसँग कानूनी रूपमा सम्बन्धविच्छेद गरिसकेको तर दुवैबीचको सम्बन्ध अझै सुमधुर रहेको जानकारी आफूले पाएको बताएका छन् ।
उनले बहुविवाहको आरोपलाई व्यक्तिगत र पारिवारिक सन्दर्भको विषय भन्दै यसलाई राजनीतिक मुद्दा बनाउन नहुने धारणा राखेका छन् ।
पार्टीभित्रको सन्देश
रुपन्देही–३ मा उम्मेदवार टुंगो लाग्नेबित्तिकै आन्तरिक बहस चर्किनु र अन्तरक्रिया कार्यक्रम स्थगित हुनुले रास्वपाभित्र अझै संस्थागत स्थिरता नआएको सङ्केत गर्छ ।
निर्वाचनमा ताजा उम्मेदवार उठाएर जनतामाझ जाने रणनीति लिएको रास्वपाले उम्मेदवार छनोट प्रक्रियामाथि उठेका प्रश्न र असन्तुष्टिलाई कसरी सम्बोधन गर्छ भन्ने कुराले पार्टीको भविष्यका लागि महत्वपूर्ण भूमिका खेल्ने देखिन्छ ।
