लगातार मूल्यवृद्धि : सोमबार पनि सुनचाँदीको भाउ उकालो
दाङ । दसैँ सकिएसँगै नेपाली बजारमा सुनचाँदीको मूल्य फेरि उकालो लागेको छ । नेपाल सुनचाँदी रत्न तथा आभूषण महासंघका अनुसार सोमबार पनि सुन र चाँदी दुबैको भाउ वृद्धि भएको छ ।
सुनको मूल्य सोमबार तोलामा रु २,५०० ले बढेर छापावाला सुन प्रतितोला रु २,३३,१०० कायम भएको छ। आइतबार सो मूल्य प्रतितोला रु २,३०,६०० थियो ।
यसअघि दशैंअघि सुनको मूल्य प्रतितोला रु २,२३,२०० मात्र रहेकोमा, दसैँ अवधिभर लगातार बढ्दै सोमबारसम्म आइपुग्दा तोलामा रु ९,९०० ले वृद्धि भएको हो ।
त्यस्तै, चाँदीको मूल्य पनि उकालो लाग्दै सोमबार प्रतितोला रु ३० ले बढेको छ। आइतबार रु २,९३० मा कारोबार भएको असली चाँदी सोमबार रु २,९६० मा कारोबार भइरहेको महासंघले जनाएको छ ।
महासंघका अनुसार अन्तर्राष्ट्रिय बजारमा बढ्दो सुनको मूल्य, अमेरिकी डलरको सशक्तिकरण र स्थानीय बजारमा चाडपर्वपछिको मागवृद्धि नै मूल्य बढ्नुका मुख्य कारण हुन् । बजार विश्लेषकहरूले मूल्य अझै केही दिन स्थिर नहुने अनुमान गरेका छन् ।
