तमु ल्होसारले भाइचारा र सांस्कृतिक संरक्षणमा योगदान पुर्याएको छ-मुख्यमन्त्री आचार्य
दाङ । लुम्बिनी प्रदेशका मुख्यमन्त्री चेतनारायण आचार्यले गुरुङ समुदायको महान् पर्व तमु ल्होसारले समाजमा आपसी भाइचारा, सद्भाव र बन्धुत्वको भावना सुदृढ बनाउँदै मौलिक भाषा, संस्कृति र पहिचानको संरक्षण तथा प्रवर्द्धनमा महत्वपूर्ण योगदान पुर्याउँदै आएको बताएका छ ।
तमु ल्होसारको अवसरमा शुभकामना सन्देश जारी गर्दै मुख्यमन्त्री आचार्यले यस्ता मौलिक पर्वहरूले ‘विविधतामा एकता’ भन्ने साझा नेपाली मूल्यलाई थप मजबुत बनाउने विश्वास व्यक्त गरे ।
उनका अनुसार तमु ल्होसारजस्ता पर्वहरूले विभिन्न समुदायबीच आपसी सम्मान, सहिष्णुता र सामाजिक सद्भाव बढाउन सहयोग पुर्याउँछन् ।
शुभकामना सन्देशमा मुख्यमन्त्री आचार्यले लुम्बिनी प्रदेश भौगोलिक रूपमा मात्र नभई भाषा, संस्कृति, कला र सभ्यताका दृष्टिले पनि विविधतायुक्त प्रदेश भएको उल्लेख गरे ।
बहुजातीय, बहुभाषिक र बहुसांस्कृतिक समाजमा मनाइने यस्ता पर्वहरूले सबै नेपालीबीच सामाजिक एकता बलियो बनाउने उनको भनाइ छ ।
मुख्यमन्त्री आचार्यले प्रदेश सरकारले भाषा, संस्कृति, सभ्यता र लिपिहरूको संरक्षण तथा प्रवर्द्धनलाई उच्च प्राथमिकतामा राख्दै आएको जानकारी दिए ।
प्रदेशभित्र रहेका सबै भाषा र सांस्कृतिक पहिचानको संरक्षणका लागि आवश्यक नीतिगत व्यवस्था गर्न भाषा ऐन निर्माणसम्बन्धी छलफल अगाडि बढाइएको उनले स्पष्ट पारे ।
सबै धर्म, संस्कृति, परम्परा र सांस्कृतिक अभ्यासलाई समान दृष्टिकोणका साथ सम्मान गर्ने नीति प्रदेश सरकारको स्पष्ट प्रतिबद्धता रहेको पनि उनले उल्लेख गरे ।
मौलिक संस्कृति र परम्पराको संरक्षणसँगै पर्यटन प्रवर्द्धनमार्फत आर्थिक तथा सामाजिक रूपमा समृद्ध प्रदेश निर्माण गर्न सकिने विश्वास व्यक्त गर्दै मुख्यमन्त्री आचार्यले प्रदेश सरकारको ‘समृद्ध लुम्बिनी, खुसी नागरिक’ भन्ने लक्ष्य हासिल गर्न तमु ल्होसार पर्वले सबैमा नयाँ उत्साह, ऊर्जा र प्रेरणा प्रदान गरोस् भन्ने कामना गरे ।
शुभकामना सन्देशमार्फत् मुख्यमन्त्री आचार्यले तमु समुदायसहित सम्पूर्ण प्रदेशवासीको सुख, शान्ति, समृद्धि र उत्तरोत्तर प्रगतिको कामना गरे ।
