न्यूनस्तर भेटिएपछि ‘तेज’ ब्रान्डको तोरी तेल बजारबाट फिर्ता गर्न आदेश
काठमाडौं । खाद्य प्रविधि तथा सपा नियन्त्रण विभागले न्यूनस्तर पाइएपछि ‘तेज’ ब्रान्डको तोरी तेल बजारबाट फिर्ता गर्न आदेश जारी गरेको छ ।
विभागले शुक्रबार सूचना जारी गर्दै बजार अनुगमन तथा निरीक्षणका क्रममा संकलन गरिएको नमुना प्रयोगशालामा परीक्षण गर्दा उक्त तेल नेपाल सरकारले तोकेको मापदण्डअनुसार नभेटिएको जनाएको छ ।
विभागका अनुसार फिर्ता गर्न निर्देशन दिइएको खाद्य पदार्थ आयातित तोरी गेडाबाट उत्पादन गरिएको तोरी तेल हो, जसको ब्याच नम्बर २० रहेको छ । उक्त तेलको उत्पादन मिति २०८२ फागुन २८ रहेको तथा उपभोग्य अवधि ६ महिना तोकिएको छ ।
खाद्य स्वच्छता तथा गुणस्तर ऐन, २०८१ को दफा ३८(२) बमोजिम सम्बन्धित ब्याचका सबै उत्पादन तत्काल बजारबाट फिर्ता (रिकल) गर्न तथा सोही ऐनको दफा ३८(४) अनुसार बिक्री–वितरण नगर्न/नगराउन विभागले सम्बन्धित उत्पादकलाई निर्देशन दिएको जनाएको छ ।
विभागका अनुसार उक्त तेलको उत्पादक सिद्धार्थ आयल इन्डस्ट्रिज, गुरबानिया, रुपन्देही रहेको छ । विभागले उपभोक्तालाई पनि उक्त ब्याच नम्बरको तेल खरिद तथा प्रयोग नगर्न आग्रह गरेको छ ।
