भारतको कानपुरमा आठ प्रहरीको हत्या आरोपमा पक्राउ परेका विकास दुबे प्रहरी इन्काउन्टरमा मारिए
काठमाडौं, २६ असार ।
भारतको कानपुरमा आठ प्रहरीको हत्याको सूत्रधार मानिएका विकास दुबे मारिएका छन् । हिजो मात्रै पक्राउ परेका दुबेलाई पक्राउपछि कानपुर लैजानेक्रममा प्रहरीले इन्काउन्टर गरेको हो ।
भारतीय मिडियाका अनुसार विकास दुबे भाग्ने प्रयास गरेका थिए । दुबेको शवलाई लाला लाजपत राई अस्पताल पुराईएको छ । विकास दुबेलाई उत्तर प्रदेशको उज्जैनबाट कानपुर लैजाने क्रममा एसटीएफको गाडी आज बिहान दुर्घटना भएको थियो ।
गाडी दुर्घटना भएपछि दुबे प्रहरीको हतियार खोसेर भाग्ने प्रयास गरेपछि प्रहरीले गोली चलाएको भारतीय सञ्चार माध्याममा उल्लेख छ । गाडी दुर्घटना भएको केही किलोमिटरको दुरीमा विकास दुबे र प्रहरीबीच भिडन्त भएको बताईएको छ । गोली लागेर गम्भीर घाईते दुबेको मृत्यु भएको छ ।
यूपी एसटीएफका अधिकारीहरूले अझै पनि दुर्घटनाको बारेमा केही भन्न मानिरहेका छैनन् । मिडियाको आँखाबाट विकास दुबे बचाउनको लागि तिब्र गतिमा अगाडी गुडेको गाडी दुर्घटना भएको उल्लेख छ ।
दुबे मध्य प्रदेशको उज्जैनबाट हिजो पक्राउ परेका थिए । विकास दुबेले आत्मसर्मपण गरेको मनिएको थियो । विकास दुबेले आत्मसमर्पण गर्नुअघि स्थानीय मिडियालाई जानकारी गराएका थिए।
आफूलाई इन्काउन्टर गर्ने दुवेलाई आशंका भएका कारण पक्राउ पर्नुअघि मिडियालाई जानकारी गराएको आकलन थियो । यसपछि उनले उज्जैनको महाकाल पुलिस स्टेशन नजिकै स्थानीय पुलिससामु आत्मसमर्पण गरेको भारतीय सञ्चारमाध्यमको आशंका थियो ।
भारतको कानपुरमा अपराधीलाई पक्राउ गर्नेक्रममा भएको आक्रमणमा असार १९ गते एक जना डीएसपीसहित ८ जनाको मृत्यु भएको थियो । ठूलो संख्यामा प्रहरीहरु घाईते भएका थिए । दुबेलाई पक्राउ गर्न चौबेपुर प्रहरी चौकीबाट गएको प्रहरी टोलीमाथी दुबैको समूहबाट गोली प्रहार भएको थियो ।
