भारतको उत्तराखण्डमा हिमनदी फुट्दा कम्तिमा १ सय ५० जना बेपत्ता, गाउँहरू खाली गराइए
काठमाडौ । भारतीय प्रान्त उत्तराखण्डको चमोली जिल्लामा हिमनदीको एक भाग फुट्दा ऋषि गंगा जलविद्युत आयोजनामा काम गरिरहेका १ सय ५० जना बेपत्ता भएको भारतीय सञ्चार माध्यमले जनाएका छन् ।
प्रभावित हुन सक्ने गाउँका मानिसहरूलाई त्यहाँबाट खाली गराइएको र उद्धार कार्य शुरू गरिएको छ ।
उत्तराखण्डका प्रमुख सचिव ओमप्रकाशले तत्काल यकिन संख्या थाहा नभएपनि कम्तिमा २ सय जना बेपत्ता भएको हुन सक्ने उल्लेख गरेका छन् । हिमनदीबाट बनेको नदीमा बगिरहने जलस्तर बढ्दै गएको देखिएपछि ती क्षेत्रमा मानिसहरूलाई हटाउन लगाइएको थियो ।
भारतका टेलिभिजन र समाचार संस्थाहरूमा नदीको प्रवाहसहितका फुटेजहरू प्रसारण गरिएको रायेटर्सले जनाएको छ ।
उत्तराखण्डका मुख्यमन्त्री त्रिवेन्द्र सिंह रावतले अलकनन्दा नदीको प्रवाह नन्दप्रयाग भन्दा परको क्षेत्रमा सामान्यभन्दा बढी फराकिलो हुन पुगेको र उद्धार कार्यका लागि काम भइरहेको ट्वीटरमा जनाएका छन् ।
नदीको पानीस्तर सामान्यभन्दा एक मिटर माथि रहेको छ । तर यसको प्रवाहमा भने कमी रहेको छ । चामोली जिल्लाको प्रहरीले त्यसक्षेत्रका बासिन्दालाई सक्दो छिट्टो अन्यत्र सर्न आग्रह गरिएको छ ।
