सत्तारुढ गठबन्धनमा ६ वटा महानगरपालिका र ११ उपमहानगरपालिकामा सहमति
काठमाडौं । सत्तारुढ पाँचदलीय गठबन्धनले भागबण्डा टुंगो लगाएको छ । स्थानीय तह निर्वाचनका लागि सत्तारुढ गठबन्धनले ६ महानगरपालिका र ११ उपमहानगरपालिकाको मेयर र उपमेयरमा सहमति जुटाएका हुन् ।
बुधबार प्रधानमन्त्रीको सरकारी निवास बालुवाटारमा बसेको नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी र राष्ट्रिय जनमोर्चाबीच महानगर र उपमहानगरको मेयर र उपमेयरमा लिखित सहमति नै भएको हो ।
जस अनुसार कांग्रेसले विराटनगर, काठमाडौं र ललितपुरको मेयर तथा वीरगञ्ज, भरतपुर र पोखरा महानगरपालिकाको उपमेयर पद लिनेछ ।
नेकपा माओवादी केन्द्रले भरतपुर महानगरपालिकाको मेयर र ललितपुरको उपमेयर पाउनेछ ।
नेकपा एकीकृत समाजवादीले पोखरा महानगरपालिकाको मेयर र काठमाडौं महानगरपालिकाको उपमेयर पाउनेछ ।
जनता समाजवादी पार्टीले वीरगञ्जको मेयर र विराटनगरको उपमेयर पाउनेछ ।
