गुल्मीकाे छत्रकोट र सत्यवतीमा एमाले विजयी
गुल्मी । गुल्मीको छत्रकोट गाउँपालिकाको अध्यक्ष तथा उपाध्यक्षमा नेकपा (एमाले)का उम्मेदवार विजयी भएका छन् ।
एमालेको तर्फबाट रामप्रसाद पाण्डेले ६ हजार ५८६ मत प्राप्त गरी निर्वाचित भए भने उनका निकटतम प्रतिद्वन्द्वी कांग्रेसका अनन्तराम पौडेलले ५ हजार ९४५ मत प्राप्त गरे ।
उपाध्यक्षमा एमालेकै सावित्रा ज्ञवालीले ६ हजार ४७२ मतसहित निर्वाचित हुँदा निकटम प्रतिद्वन्द्वी राष्ट्रिय जनमोर्चाका गुमान सिंह पुन मगरले ५ हजार १२४ मत ल्याए । छत्रकोटमा एमालेविरुद्ध पाँच दलीय गठबन्धन थियो । पालिकाकाको छ वटा वडामध्ये वडा नम्बर १, २ र ५ कांग्रेसले जितेको छ भने ३, ४ र ६ मा एमालेले जितेको छ ।
यसैगरी सत्यवती गाउँपालिकामा एमालेकै टिकाराम पाण्डे अध्यक्षमा निर्वाचित भएका छन् । उनले ६ हजार २६७ मत प्राप्त गर्दा निकटतम प्रतिद्वन्द्वी कांग्रेसका पाँच हजार ६११ मत प्राप्त गरे ।
उपाध्यक्षमा एमालेकै निरमाया पुन ६ हजार २२४ मतसहित विजयी भइन् । निकटतम प्रतिद्वन्द्वी कांग्रेसकी तेजकुमारी थापाले ५ हजार ५६१ मत ल्याइन् । सत्यवतीका आठवटा वडामध्ये पाँचमा एमाले, दुईमा कांग्रेस र एक वडामा माओवादी केन्द्रले वडाध्यक्ष जितेका छन् । रासस
