अर्घाखाँचीमा भएको मोटरसाइकल दुर्घटनामा २ जनाको मृत्यु
अर्घाखाँची । अर्घाखाँचीको सन्धिखर्कमा निर्माणाधीन अर्घाभगवती बिमानस्थलमा मोटरसाइकल दुर्घटना हुँदा दुई जनाको मृत्यु भएको छ भने २ जना घाइते भएका छन् ।
सन्धिखर्क-१० शिखरबार्नीमा निर्माणाधीन विमानस्थलको रनवेमा मोटरसाइकल चलाउने क्रममा हिजो राति अनियन्त्रित भई दुई मोटरसाइकल दुर्घटनामा परेका हुन्।
प्रदेश नम्बर २-०३८-प-५०३२ नम्बरको मोटरसाइकल दुर्घटनामा मोटरसाइकलमा सवार सन्धिखर्क नगरपालिका-१ मिडिया चोकका २६ वर्षीय रोशन सुनाम र हललाइनका २२ वर्षीय कृतिम रायमाझीको घटनास्थलमै मृत्यु भएको जिल्ला प्रहरी कार्यालयका सूचना अधिकारी तथा प्रहरी निरीक्षक कृष्णप्रसाद घिमिरेले बताए।
अर्को बा २५ प ८८७६ नम्बरको मोटरसाइकलमा सवार सन्धिखर्क २ आटिकापाटा निवासी ५७ वर्षीय हेमराज भुसाल र २० वर्षीय विष्णु पराजुली घाइते भएका छन् । घाइतेको बुटवलमा रहेको मर्सिटी हस्पिटलमा उपचार भइरहेको प्रहरीको भनाइ छ ।
मोटरसाइकल ओभर स्पिडका कारण घटना भएको हुनसक्ने प्रहरीको प्रारम्भिक अनुसन्धान रहेको छ। घटनाको बारेमा अनुसन्धान भइरहेको प्रहरीले जनाएको छ।
