पहिलो महिनाको पारिश्रमिक विद्यालयलाई दिने प्रतिनिधि सभा सदस्य सूर्य थापाको घोषणा
प्युठान। नेकपा एमालेका पोलिटब्युरो सदस्य एवं प्रतिनिधि सभा सदस्य सूर्य थापाले आफ्नो पहिलो महिनाको पारिश्रमिक विद्यालयलाई दिने घोषणा गरेका छन् ।
थापाले प्युठानको मल्लारानी गाउँपालिका -२ चुँजामा रहेको अमर माविलाई आफ्नो पहिलो महिनाको पारिश्रमिक उपलब्ध गराउने घोषणा गरेका हुन् ।
विद्यालयका बुधबार स्वर्ण महोत्सवको विशेष समारोह उद्घाटन गर्दै सांसद थापाले पार्टीलाई बुझाउने लेबी र कर कट्टीपछि बचेको पारिश्रमिक उपलब्ध गराउने बताए ।
उनले भने,“ मै सांसद भए वापत आउने पहिलो महिनाको तलब यस विद्यालयलाई उपलब्ध गराउन चाहुन्छ । आशा छ विद्यालयले उक्त रकमलाई सही सदुपयोग गर्ने छ ।”
थापा गत मंङ्सिर ४ मा भएको चुनावमा प्युठानबाट प्रतिनिधि सभामा निर्वाचित भएका थिए ।
कार्यक्रममा विद्यालयका संस्थापक प्रधानाध्यापक तथा जिविस प्युठानका पूर्व सभापति र राष्ट्रिय जनमोर्चाका केन्द्रीय नेता बोमबहादुर खत्री, पहिलो ब्याचका विद्यार्थी एवं गहुँ बाली विशेषज्ञ घनश्याम गिरी लगायतलाई थापाले सम्मान गरेका थिए ।
