भाैतिकको बजेट ५४ अर्बले कटौति, मन्त्री ज्वाला भन्छन्, ‘बजेट गरिबको लागि खानेकुरा जस्तो भाे’
काठमाडाैँ। भौतिक पूर्वाधार तथा यातायातमन्त्री प्रकाश ज्वालाले आगामी आर्थिक वर्षमा भौतिक मन्त्रालयको बजेट सबैभन्दा धेरै कटौति भएको बताएका छन् ।
आईतवार काठमाडौंमा पेशागत महासंघ नेपालले आयोजना गरेको कार्यक्रमलाई सम्बोधन गर्दै उनले आगामी आर्थिक वर्षमा मन्त्रालयको बजेट ५४ अर्ब कटौति भएको जानकारी गराए ।
चालु आर्थिक वर्षमा १६३ अर्ब बजेट रहेको भए पनि आगामी आर्थिक वर्षका लागि ११३ अर्ब बजेटको सिलिङ दिइएको उनले बताए ।
आगामी आर्थिक वर्षको बजेट गरिबको लागि खानेकुरा जस्तो बनेको गुनासाे गरे । संकलन कम भइरहेको र अर्थतन्त्रका सूचकांकहरु पनि खराब रहेको भन्दै चिन्ता व्यक्त गरे ।
“हामी बजेट निर्माणको चटारोमा छाैँ । बजेटको कर्मी पनि कटौति पनि छ । कटौति भएको कन्फर्टेबल बजेट सिलिङ हुन्थ्यो भने यति धेरै प्रेसर हुँदैन थियो होला।” मन्त्री ज्वालाले भने, “यता ताने उता मिल्दैन, उता ताने यता मिल्दैन । गरिबी जस्तो भएको छ । बिहान खाँदा साँझ नपुग्ने साँझ खाँदा बिहान नपुग्ने जस्तो भएको छ ।”
कमजाेर राजश्व संकलन र खराब सूचकांककाे मारमा बजेट परेको उनकाे भनाइ छ । “बजेट मारमा पर्नु भनेको हाम्रा प्रोजेक्टहरु, योजना, कार्यक्रम मारमा पर्नु हो । अत्यन्त कठिन छ बजेट बनाउन । धेरै मागहरु सम्बोधन गर्न कठिन छ ।” मन्त्री ज्वालाले भने ।
