मुद्धा दर्ता गर्न जनता समाजवादी पार्टीका नेता सरकारी वकिलको कार्यालयमा
काठमाडौं,१६ वैशाख ।
आफ्ना सांसद अपहरणबारे मुद्धा दर्ता गर्न जनता समाजवादी पार्टीका नेता सरकारी वकिलको कार्यालय बबरमहल पुगेका छन् ।
महानगरीय प्रहरी परिसर टेकु काठमाण्डौंले मुद्धा दर्ता गर्न अस्वीकार गरेपछि जसपाका नेताहरु मुद्धा दर्ता गर्न सरकारी वकिल कार्यालय पुगेका हुन् ।
सत्तारुढ नेपाल कम्युनिष्ट पार्टी (नेकपा)का सांसद महेश बस्नेत र किसान श्रेष्ठ तथा नेपाल प्रहरीका पूर्वमहानिरीक्षक सर्वेन्द्र खनालविरुद्ध जाहेरी दर्ता गर्न जसपाका नेतासहित सांसद डा. सुरेन्द्र यादव पार्टीका नेताहरुलाई लिएर बबरमहलस्थित कार्यालय पुगेका हुन् ।
उनीहरुले महानगरीय प्रहरी परिसर, काठमाडौंमा जाहेरी दिन खोजेपनि घटनास्थल महोत्तरीमै मुद्धा दर्ता गर्न भन्दै प्रहरीले मानेको थिएन ।
बस्नेत, श्रेष्ठ र खनालले तत्कालीन समाजवादी पार्टीका सांसद डा. यादवलाई वैशाख १० गते महोत्तरीबाट काठमाडौं ल्याएर नक्सालस्थित होटेल महोत्तरीमा राखेका थिए । सांसद यादवले आफूलाई जबर्जस्ती काठमाडौं ल्याएको भन्दै अपहरणको मुद्धामा अनुसन्धान गर्न जाहेरी दिन लागेका हुन् ।
तत्कालिन समाजवादी पार्टीका नेताहरूले प्रधानमन्त्रीकै निर्देशनमा आफ्ना सांसदलाई अपहरण गरिएको दाबी गर्दै आएका छन् । बैशाख ११ गते सांसद यादव मेरियट होटलबाट भागेर समाजवादी पार्टीका नेताहरूको सम्पर्कमा पुगेका थिए ।
यादवले सार्वजनिक रुपमा आफूलाई अपहरणकै शैलीमा काठमाडौं ल्याइएको बताउदै आएका छन् । यद्धपी खनाल, श्रेष्ठ र बस्नेतले भने उनकै सहमतिमा काठमाडौं ल्याइएको बताउँदै आएका छन् ।
