कर्पोरेट सुपर सिक्सेस प्रतियोगिताको तयारी पूरा
काठमाडौँ । आइतवार सुरू हुने तीनदिने कर्पोरेट सुपर सिक्सेस सिजन–७ को तयारी पूरा भएको छ।
आयोजकद्वय एसएस इभेन्ट्स प्रालि र नेकोसले शुक्रवार नक्सालमा संयुक्त पत्रकार सम्मेलन गर्दै तयारी पूरा भएको जानकारी दिएका हुन्।
एएस इभेन्ट्स प्रालिका निर्देशक सुमित रौनियारले तयारी पूरा भएको जानकारी दिए। पत्रकार सम्मेलनमा समूह विभाजनसँगै ट्रफी र जर्सी सार्वजनिक गरियो।
एएस इभेन्ट्स प्रालिका निर्देशक रौनियार, प्रतियोगिता निर्देशक प्रविन जोशी र नेकोसका महासचिव धरमबहादुर लामाले संयुक्त रूपमा ट्रफी र अन्य अतिथिले जर्सी सार्वजनिक गरेका हुन्।
५ ओभरमा खेलाइने प्रतियोगिता मूलपानी क्रिकेट मैदान (माथिल्लो) मा हुने भएको छ। यस संस्करणमा कुल १५ कर्पोरेट हाउसले प्रतिष्पर्धा गर्नेछन् भने ती टोलीलाई कुल ४ समूहमा विभाजन गरिएको छ।
३ समूहमा समान ४ टोली रहनेछन्। एउटा समूहमा ३ टोली मात्र प्रतिष्पर्धा गर्ने प्राविधिक संयोजक विनयकुमार झाले जानकारी दिए।
शुक्रवार नै सार्वजनिक गरिएको थियो ड्र अनुसार समूह ‘ए’ मा माच्छापुच्छ्रे बैंक, क्लाउड फ्याक्ट्री, एनआइसी एशिया बैँक र प्राइम बैँक तथा समूह ‘बी’ मा आइसिएफसी फाइनान्स, जगदम्बा ग्रुप, सिप्रदी र कुमारी बैँक छन्।
समूह ‘सी’ मा सूर्य नेपाल, आइएमई ग्रुप, नेपाल बैँक र एनसेल लिजेन्ड्स तथा समूह ‘डी’ मा एनसेल इलाइट्स र सुबिसी गरी तीन टोलीले मात्र प्रतिस्पर्धा गर्नेछन्।
प्रत्येक समूहबाट शीर्ष २ टोलीले क्वार्टरफाइनलमा स्थान बनाउनेछन्। प्रतियोगिता लिगकम नकआउटका आधारमा सञ्चालन हुँदै छ। यस सिजनको विजेता र उपविजेताले ट्रफी र गिफ्ट ह्याम्पर पाउनेछन्।
विजेताले आगामी सिजन फ्रि इन्ट्री पाउने आयोजकले जनाएको छ। प्लेयर अफ दी टुर्नामेन्ट, बेस्ट ब्याट्सम्यान, बेस्ट बलर, बेस्ट फिल्डर र बेस्ट विकेटकिपरले पनि पुरस्कार पाउनेछन्।
आयोजकका अनुसार सर्वाधिक छक्का प्रहार गर्ने खेलाडी, हिट बोर्ड र फेयर प्ले अवार्ड पनि प्रदान गरिने भएको छ।
सन् २०१४ सुरू भएको कर्पोरेट सुपर सिक्सेसको छैटौँ सिजनसम्म एसएस एभेन्ट्सले नै आयोजना गर्दै आएको थियो। सातौँ सिजनदेखि नेकोस जोडिएको हो।