प्रथम सहाना प्रधान यु–१९ महिला तथा पुरुष भलिबल च्याम्पियनसिप असारमा हुने
काठमाडौँ । प्रथम सहाना प्रधान यु–१९ महिला तथा पुरुष भलिबल च्याम्पियनसिप असारमा हुने भएको छ ।
सहाना प्रधान प्रतिष्ठानको आयोजनामा तथा नेपाल भलिबल संघको प्राविधिक र व्यवस्थापनमा असार ९ गतेदेखि १५ गतेसम्म च्याम्पिनसिप हुने भएको हो ।
बुधवार पत्रकार सम्मेलनमा प्रतियोगिताको बारेमा जानकारी गराइएको थियो । प्रतियोगितामा ७ प्रदेशका महिला र पुरुषबीच सहभागिता रहनेछ । संघका अध्यक्ष जितेन्द्रबहादुर चन्दले तयारी पनि भइरहेको बताए । दुवैतर्फको विजेताले ३ लाख, दोस्रोले २ लाख र तेस्रोले १ लाख रुपैयाँ प्राप्त गर्नेछन् ।
प्रतियोगिताको दुवैतर्फका सर्वोत्कृष्ट खेलाडीले २५ हजार र व्यक्तिगत विधातर्फ १० हजार रुपैयाँ प्राप्त गर्नेछन् । प्रतियोगिताबाट यु–१९ राष्ट्रिय टोलीका लागि खेलाडी छनोट गरिने भलिबल संघका अध्यक्ष चन्दले जानकारी दिए ।
कार्यक्रममा प्रतिष्ठानकी अध्यक्ष तथा पूर्वमन्त्री रामकुमारी झाँक्री र भलिबल संघका अध्यक्ष चन्दले सम्झौतापत्रमा हस्ताक्षर गरेका थिए । प्रतियोगिताको लागि ८० लाख रुपैयाँ खर्च हुने अनुमान गरिएको छ । प्रतियोगिताको आर्थिक व्यवस्थापन प्रतिष्ठान गर्ने उल्लेख गरिएको छ ।
