ओभरलोड रोक्न जरिवाना होइन, सवारीबाटै भार झार्नुपर्छ : अध्यक्ष बाँनिया
काठमाडाैँ । नेपाल ट्रक यातायात व्यवसायी महासंघका अध्यक्ष राजेन्द्र विक्रम बाँनियाले ओभरलोड नियन्त्रण र सडक अनुशासन कायम गर्न कडाइका साथ कदम चाल्न सरकार तथा प्रहरी प्रशासनलाई आग्रह गरेका छन् ।
नेपाल यातायात व्यवसायी राष्ट्रिय महासंघको सातौँ राष्ट्रिय महाधिवेशनलाई पोखरामा सम्बोधन गर्दै अध्यक्ष बाँनियाले अहिले यातायात क्षेत्रमा देखिएका धेरै समस्या समाधान गर्न सरकार, प्रदेश र सुरक्षा निकायले प्रभावकारी भूमिका खेल्नुपर्ने बताए ।
उनले विशेषगरी लुम्बिनी प्रदेशमा ओभरलोडको समस्या अत्यधिक बढेको उल्लेख गर्दै त्यसको असर बागमती र गण्डकी प्रदेशसम्म परेको बताए । ठूला उद्योग तथा फ्याक्ट्रीहरूले अत्यधिक भार बोकेर सवारी सञ्चालन गराउँदा सडक तथा पुलहरू जोखिममा परेको उनको भनाइ थियो ।
बाँनियाले भारतीय सवारी साधनले ओभरलोडकै कारण दुई वटा पुल भत्किएको उदाहरण दिँदै अहिलेको जरिवाना प्रणाली प्रभावकारी नभएको बताए । “३० हजार बराबरको ओभरलोड बोकेको सवारीलाई १५ सय रुपैयाँ जरिवाना तिर्नु कुनै ठूलो कुरा भएन,” उनले भने ।
उनका अनुसार बागमती प्रदेश सरकारले ओभरलोडको अनुपात र दूरीका आधारमा जरिवाना गर्ने व्यवस्था अघि बढाइसकेको छ । गण्डकी प्रदेशले पनि यस्तै नीति अवलम्बन गर्नुपर्ने उनको माग थियो ।
कार्यक्रममा उनले प्रहरी प्रशासनको ध्यान पनि सडक सुरक्षातर्फ केन्द्रित गराउन आग्रह गरे । उनले हाल दैनिक सयौँ सवारी चालक कारबाहीमा परिरहेको तथ्य उल्लेख गर्दै सडक अनुशासन अझै प्रभावकारी बन्न नसकेको बताए ।
“आज ४४६ जना कारबाहीमा परेका छन् भने भोलिपल्ट त्यो संख्या घट्नुपर्ने हो, तर झन् बढिरहेको छ,” उनले भने, “यसले सडक अनुशासन पालना कमजोर रहेको देखाउँछ ।”
उनले नयाँ सरकारले यातायात क्षेत्र सुधारका लागि काम गर्ने संकेत देखिएको भन्दै ओभरलोड नियन्त्रणलाई अभियानकै रूपमा अघि बढाउनुपर्ने बताए । केवल जरिवानाले समस्या समाधान नहुने भएकाले ओभरलोड भएका सवारीलाई तत्काल भार घटाउन लगाउने व्यवस्था लागू गर्नुपर्ने उनको धारणा थियो ।
बाँनियाले सडक सुरक्षा र दुर्घटना न्यूनीकरणका लागि प्रदेश सरकार, प्रहरी र व्यवसायी सबै पक्ष जिम्मेवार बन्नुपर्नेमा जोड दिँदै यातायात व्यवसायीहरूको हकहित संरक्षणमा नयाँ नेतृत्व सफल हुने विश्वास व्यक्त गरे ।
