स्याङ्जामा अवैध नदीजन्य पदार्थ उत्खनन र ओसारपसारमा संलग्न ट्याक्टर नियन्त्रणमा
काठमाडाैँ । स्याङ्जामा अवैध रूपमा नदिजन्य पदार्थ उत्खनन तथा ओसारपसार भइरहेको सूचनाको आधारमा प्रहरीले कारबाही गरेको छ। जिल्ला प्रहरी कार्यालय स्याङ्जा र इलाका प्रहरी कार्यालय चापाकोटबाट खटिएको संयुक्त प्रहरी टोलीले विभिन्न स्थानबाट ट्याक्टरसहित नदिजन्य पदार्थ नियन्त्रणमा लिएको हो।
प्रहरीका अनुसार प्राप्त सूचनापछि खटिएको टोलीले स्याङ्जाको पुतलीबजार नगरपालिका–०५ नयाँबजार क्षेत्रमा रसिद बिना गिट्टी तथा बालुवा मिक्स ओसारपसार गरिरहेको अवस्थामा ग.१ त. ६१७३ र ग.१ त. ६२२७ नम्बरका ट्याक्टर फेला पारेको थियो। दुवै ट्याक्टरलाई नियन्त्रणमा लिएर आवश्यक अनुसन्धान तथा कानूनी कारबाहीका लागि पुतलीबजार नगरपालिकाको कार्यालयमा पठाइएको प्रहरीले जनाएको छ।
त्यसैगरी, चापाकोट नगरपालिका–९ स्थित निर्दीमघाट क्षेत्र, कालीगण्डकी नदी किनारबाट लु.३ त. १९६० नम्बरको ट्याक्टरलाई बालुवा ओसारपसार गरिरहेको अवस्थामा नियन्त्रणमा लिइएको छ। उक्त ट्याक्टरलाई चापाकोट नगरपालिकाको कार्यालयमा आवश्यक कारबाहीका लागि बुझाइएको प्रहरीले जानकारी दिएको छ।
प्रहरीले नदीजन्य पदार्थको अवैध उत्खनन तथा ढुवानीले वातावरणीय क्षति र प्राकृतिक स्रोतको दोहन बढाउने भएकाले यस्ता गतिविधिमा संलग्नमाथि कडा निगरानी र कारबाही जारी रहने जनाएको छ।
