रोल्पामा राष्ट्रिय भलिबल प्रतियोगिता सुरु : सनस्टार र त्रिभुवन आर्मी क्लवकाे विजयी सुरुवात
रोल्पा । रोल्पामा दोस्रो राष्ट्रिय भलिबल प्रतियोगिता सुरु भएको छ । सनस्टार युवा क्लवको आयोजनामा प्रतियोगिता सुरु भएको हो ।
प्रतियोगिताको पहिलो खेलमा आयोजक सनस्टार युवा क्लव र त्रिभुवन आर्मी क्लव विजयी भएका छन् । सनस्टार युवा क्लव र मधेश प्रदेश बीच भएको खेलमा २६–२४, ३१–२९ र २५–१८ को सोझो सेटमा सनस्टार युवा क्लवले मधेश प्रदेशमाथि जित निकाल्यो ।
त्यस्तै त्रिभुवन आर्मी क्लव र कर्णाली प्रदेश बीच भएको खेल भने रोचक बनेको थियो । त्रिभुवन आर्मी क्लवलाई २३ मा रोक्दै २५ बनाएर पहिलो सेट हात पारेको कर्णालीले खेललाई निरन्तरता दिन सकेन । विभागीय आर्मी क्लवले २५–१६, २५–१७ र २५–१८ मा कर्णाली प्रदेशलाई रोक्दै त्रिभुवन आर्मी क्लव विजयी भएको हो ।
रोल्पाको सदरमुकाम लिबाङमा जारी दोस्रो राष्ट्रिय पुरुष भलिबल प्रतियोगितामा त्रिभुवन आर्मी क्लव, नेपाल पुलिस क्लव र आयोजकसहित चारवटा प्रादेशिक टिम सहभागी छन् ।
फागुन १४ गतेसम्म सञ्चालन हुने प्रतियोतिामा प्रथम हुनेले पाँच लाख राशीको पुरस्कारसहित सनस्टार कप जित्ने छन् । त्यस्तै दोस्रो हुनेले दुई लाख पचास हजार, तेस्रो हुनेले एक लाख र सान्त्वना हुने टिमले पचास हजार रुपैयाँ हात पार्ने क्लवका अध्यक्ष पूर्ण केसीले बताएका छन् ।
