आजको मौसम : देशभर बदली, पहाडी र हिमाली क्षेत्रमा वर्षा र हिमपातको सम्भावना
काठमाडौँ । हाल देशको पश्चिमी र मध्य भूभागमा पश्चिमी तथा स्थानीय वायुको प्रभाव देखिएको छ भने कोशी प्रदेशका अधिकांश भागमा मनसुनी वायुको असर परिरहेको जल तथा मौसम पूर्वानुमान महाशाखाले जनाएको छ ।
आज दिउँसो कोशी, मधेस, बागमती र गण्डकी प्रदेशलगायत देशका पहाडी भूभागमा आंशिकदेखि साधारणतया बदली रहनेछ । बाँकी भागहरूमा मौसम सामान्यतः सफा वा आंशिक बदली रहने महाशाखाको अनुमान छ ।
यी प्रदेशका पहाडी क्षेत्रका केही स्थानमा र अन्य प्रदेशका एकदुई स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको बताइएको छ ।
साथै, देशका उच्च पहाडी तथा हिमाली भागमा केही स्थानमा हल्का वर्षा र हिमपात हुन सक्ने सम्भावना पनि महाशाखाले जनाएको छ ।
आज रातिसमेत देशभर आंशिकदेखि साधारणतया बदलीको अवस्था रहनेछ । रातिको समयमा पनि कोशी, मधेस, बागमती र गण्डकी प्रदेश तथा अन्य पहाडी भागहरूमा केही स्थानमा मेघगर्जन, चट्याङसहित वर्षाको सम्भावना यथावत् रहेको छ ।
मौसममा देखिएको यो सक्रियताका कारण सम्भावित जोखिमबाट सतर्कता अपनाउन महाशाखाले सर्वसाधारणलाई अनुरोध गरेको छ । विशेषगरी पहाडी र हिमाली क्षेत्रमा यात्रा गर्दा सावधानी अपनाउन र आवश्यक तयारी गर्न समेत सुझाव दिइएको छ ।
