आजकाे माैसम : पाँच प्रदेशमा वर्षाकाे अनुमान
काठमाडौँ । जल तथा मौसम विज्ञान विभाग, मौसम पूर्वानुमान महाशाखाले देशभर मनसुनी गतिविधि सक्रिय रहेको जानकारी दिएको छ ।
महाशाखाका अनुसार हाल मनसुनको न्यूनचापीय रेखा सरदर स्थानको आसपासमा अवस्थित छ भने बङ्गालको खाडीबाट मनसुनी हावाको प्रभाव बढेको छ ।
आज दिउँसो वाग्मती, गण्डकी, लुम्बिनी र सुदूरपश्चिम प्रदेशसहित देशका पहाडी भूभागमा साधारणतया बदली रहनेछ भने बाँकी क्षेत्रमा आंशिक बदली हुने अनुमान गरिएको छ ।
वाग्मती, गण्डकी, लुम्बिनी प्रदेशको तराई क्षेत्र तथा सुदूरपश्चिम र कर्णाली प्रदेशका पहाडी भूभागका एक–दुई स्थानमा भारी वर्षा हुने सम्भावना छ ।
आज राति देशभर सामान्य बदली हुने महाशाखाले जनाएको छ । यस अवधिमा पहाडी भागका धेरै स्थानमा मध्यम वर्षा हुने देखिएको छ ।
गण्डकी, कर्णाली र सुदूरपश्चिम प्रदेशका पहाडी भूभागका साथै लुम्बिनी र कोशी प्रदेशका तराईका एक–दुई स्थानमा भारी वर्षा हुन सक्ने चेतावनी दिइएको छ ।
महाशाखाले लगातारको वर्षाका कारण पहिरो र गेग्रान बहाव (डेब्रिज फ्लो) को जोखिम बढ्ने, ठूला तथा साना नदी–नालामा पानीको सतह उक्लन सक्ने तथा यातायात क्षेत्रमा समस्या आउन सक्ने सम्भावना औंल्याउँदै सबैलाई सतर्क रहन र आवश्यक पूर्वतयारी गर्न आग्रह गरेको छ ।
