देशभर मनसुनी प्रभाव : धेरै स्थानमा वर्षाको सम्भावना, सतर्कता अपनाउन आग्रह
काठमाडाैँ । बङ्गालको खाडीबाट आएको जलवाष्पयुक्त मनसुनी वायूको प्रभावका कारण आज देशभर साधारणतया बदली रहने जल तथा मौसम पूर्वानुमान महाशाखाले जनाएको छ ।
महाशाखाका अनुसार दिउँसो कोशी, मधेश, बागमती, गण्डकी र लुम्बिनी प्रदेशका पहाडी तथा तराई भू–भागका धेरै स्थानमा मेघगर्जन र चट्याङसहित मध्यम वर्षा हुने सम्भावना छ । बाँकी प्रदेशका पहाडी र तराई भू–भागका केही स्थानमा समेत वर्षा हुन सक्ने अनुमान गरिएको छ ।
यस्तै, कोशी, मधेश, बागमती र गण्डकी प्रदेशका पहाडी र तराई भू–भागका थोरै स्थान र लुम्बिनी प्रदेशका तराई भू–भागका एक–दुई स्थानमा भारी वर्षा हुने सम्भावना छ। मधेश, बागमती र गण्डकी प्रदेशका केही पहाडी तथा तराई क्षेत्रमा धेरै भारी वर्षाको पनि जोखिम रहेको महाशाखाले जनाएको छ।
आज राति कोशी, मधेश, बागमती र गण्डकी प्रदेशमा अधिकांश स्थानमा बादल लागेको अवस्थामा मेघगर्जनसहित वर्षा हुने पूर्वानुमान छ। लुम्बिनी प्रदेशका पहाडी र तराई भू–भागका धेरै स्थान र बाँकी प्रदेशका केही स्थानमा पनि मध्यम वर्षा हुने सम्भावना रहेको बताइएको छ।
महाशाखाका अनुसार कोशी, मधेश, बागमती र गण्डकी प्रदेशका पहाडी तथा तराई भू–भागका केही स्थान र लुम्बिनी प्रदेशका तराई क्षेत्रमा भारीदेखि धेरै भारी वर्षा हुने सम्भावना रहेकोले सतर्कता अपनाउन आग्रह गरिएको छ।
