कुकुर तिहार र लक्ष्मीपूजा एकैदिन : सुरक्षादेखि श्रद्धासम्म, कुकुरको योगदानलाई विशेष सम्मान
काठमाडाैँ । शुभ दीपावलीको तेस्रो दिन आज नेपालभर कुकुर तिहार श्रद्धा र उत्साहपूर्वक मनाइँदैछ। यसपालि विशेष योगजस्तै आजैको दिन ऐश्वर्य र सम्पन्नताको प्रतीक लक्ष्मीपूजा पनि परेपछि तिहारको उल्लास दोब्बर भएको छ।
घरघरमा धर्मराजका दूत र स्वर्गद्वारका पहरेदारका रूपमा कुकुरको पूजा गरिएको छ। धार्मिक मान्यताअनुसार आज कुकुरलाई टीका, माला र स्वादिष्ट परिकार अर्पण गर्दा यमलोक यात्रामा सहजता मिल्ने विश्वास छ।
युद्ध, उद्धार र अनुसन्धानमा सघाउने प्रहरी कुकुरहरूले पनि आज विशेष सम्मान पाएका छन्। नेपाल प्रहरीको केनाइन महाशाखाले आफ्ना कुकुरहरूको पूजाआजा गर्दै तिनलाई विशेष खेल र परिकारसमेत खुवाएको छ।
महाशाखाका अनुसार आठ प्रजातिका प्रहरी कुकुरहरू हातहतियार, विस्फोटक, लागुऔषध, ट्र्याकिङ र उद्धार कार्यमा सक्रिय छन्। प्रहरी अधिकृतहरूले भने, “हामीलाई सघाउने यी मौन साथीहरूलाई श्रद्धा व्यक्त गर्न पाउनु गर्वको क्षण हो।”
यसपालि लक्ष्मीपूजा र कुकुर तिहार एकैदिन परेपछि नेपालीहरूले श्रद्धा, प्रेम र सुरक्षाको भावनालाई एउटै पर्वमा जोड्दै मनाएका छन्-भक्ति र जिम्मेवारीको अनौठो संगमका रूपमा ।
