देशभर स्थिर मौसमी अवस्था : हिमाली क्षेत्रमा दिउँसो हल्का वर्षा र हिमपातको संकेत
काठमाडौँ । आज देशभर व्यापक रूपमा स्थिर मौसमी अवस्था रहने अनुमान गरिए पनि हिमाली भेगमा भने अल्पकालीन वर्षा–हिमपातको प्रभाव देखिन सक्ने जल तथा मौसम विज्ञान विभागले जनाएको छ ।
बिहानैदेखि अधिकांश भूभागमा मौसम खुलेको भए पनि दिउँसोपछि कोसी, वाग्मती, गण्डकी र कर्णाली प्रदेशका उच्च पहाडी क्षेत्र भने आंशिक बदलीमा पर्दै जाने विभागको मूल्याङ्कन छ।
मौसम विश्लेषकका अनुसार आजको मौसम प्रणाली कुनै ठूलो मौसमी गतिविधिसँग जोडिएको छैन। तर, स्थानीय स्तरमा विकसित हुन सक्छ भन्ने अनुमानित बादलका कारण हिमाली भूभागमा एकदुई स्थानमा हल्का वर्षा र हिमपात हुन सक्ने सम्भावना कायम रहेको बताइएको छ। यद्यपि राति भने ती क्षेत्रहरूसमेत सफा हुनेछन् ।
कोसी प्रदेशको हिमाली क्षेत्रमा दिउँसो अल्पकालीन वर्षा–हिमपातको संकेत देखिए पनि अन्य स्थानमा मौसम सामान्यतया खुला नै रहनेछ। गण्डकी र कर्णालीका कतिपय जिल्लामा दिउँसोबाट आंशिक बदली भए पनि राति सबै स्थानमा सफाइ फर्किने अनुमान छ ।
काठमाडौं उपत्यकाको आज बिहान ५:४५ बजे मापन गरिएको न्यूनतम तापक्रम ९.४ डिग्री सेल्सियस रहेको विभागले जनाएको छ ।
चिसो बढ्दो क्रममा भए पनि हाल देशभर कुनै उल्लेख्य मौसमी प्रणाली सक्रिय नभएका कारण तापक्रममा तीव्र उतार–चढाव देखिने सम्भावना नरहेको विज्ञहरूको अनुमान छ।
समग्रमा आजको मौसम हल्का बादल, सीमित हिमाली वर्षा–हिमपात र व्यापक रूपमा खुला आकाशसँगै स्थिर रहने विभागको पूर्वानुमान छ।
