नेपालले एक दिवसीय मान्यता जोगायाे,यूएई १७७ रनले पराजित
प्रकाशित मिति : 12 March, 2023 3:41 pm
काठमाडौँ । नेपालले क्रिकेटमा एक दिवसीय मान्यता जोगाएको छ ।
विश्वकप क्रिकेट लिग टू अन्तर्गत कीर्तिपुर मैदानमा आज भएको खेलमा यूएईलाई १७७ रनले हराउँदै नेपालले एकदिवसीय मान्यता जोगाएको हो ।
नेपालले दिएको २४९ रनको लक्ष्य पाएको यूएई २३ औँ ओभरमा मात्र ७१ रनमा अलआउट भयो ।
यूएईलाई सस्तैमा समेट्न नेपालका ललितनारायण राजवंशीले ५ विकेट लिए भने सन्दीप लामिछानेले २ तथा सोमपाल कामी, दिपेन्द्रसिंह ऐरी र गुल्सन झाले एक एक विकेट लिए ।
टस जितेर ब्याटिङ रोजेको नेपालले ४ बल बाँकी हुँदा नै २४८ रनमा अलआउट भएको थियो ।
नेपालका कप्तान रोहितकुमार पौडेलले सबैभन्दा ७७ रन बनाए भने आरिफ सेखले ४३, गुल्सन झाले ३७, दिपेन्द्रसिंह ऐरीले ३४ र भीम सार्कीले २९ रन बनाए । नेपालले शृंखलाको अर्को खेलमा भोली पीएनजीसँग खेल्नेछ ।