नेपाल कम्युनिष्ट पार्टी (नेकपा)को सचिवालय बैठक बेलुकी साढे ५ बजे
काठमाडाैं, २० वैशाख ।
सत्तारुढ नेपाल कम्युनिष्ट पार्टी(नेकपा)को सचिवालय बैठक बेलुकी साढे ५ बजे बस्ने भएको छ ।
पार्टीभित्र विवाद चर्किरहेका बेला सचिवालयको यो दोस्रो बैठक हो ।
१७ गते बेलुकी प्रधानमन्त्री निवास बालुवाटारमा बसेको बैठकले पार्टी एकताको सुदृढीकरण, आन्तरिक रुपमा देखिएको विवाद तथा सरकारका विषयमा थप छलफल गरेर बैठक बस्ने निर्णय गरेको थियो ।
तर, यो बीचमा शिर्ष तहका छलफल भएको औपचारिक जानकारीहरु आएका छैनन् । प्रधानमन्त्री केपी शर्मा ओली र अर्का अध्यक्ष पुष्पकमल दाहाल प्रचण्ड र माधव कुमार नेपालपक्षबीच आफूपक्षीय सांसदहरुको हस्ताक्षर अभियान पनि रोकिएको छैन ।
बैठकले प्रधानमन्त्रीको राजीनामा तथा त्यसपछि हुन सक्ने विकसित घटनाक्रमबारे टुंगो लगाउने अपेक्षा गरिएको छ । पार्टीका उपाध्यक्ष बामदेव गौतमलाई प्रधानमन्त्रीका रुपमा अगाडी बढाउन खोजिएको चर्चा चलिरहेको छ ।
प्रधानमन्त्री केपी शर्मा ओलीको जोडबलमा दल विभाजलाई सहज तुल्याउने अध्यादेश सरकारबाट आएपछि सत्तारुढ नेकपाभित्र विवाद चर्किएको छ ।
अहिले विवाद मत्थर पार्नका लागि आन्तरिक प्रयासहरु भईरहेका छन् । थप छलफलका लागि बेलुकी साढे ५ बजे प्रधानमन्त्री निवास बालुवाटारमा बैठक बस्ने प्रधानमन्त्रीका प्रेस सल्लाहकार सूर्य थापाले जानकारी गराएका छन् ।
