विश्वकप विजेता वेस्ट इन्डिजमाथि नेपालको ऐतिहासिक जित
दाङ । नेपालले शनिबार राति वेस्ट इन्डिजलाई पराजित गर्दै विश्व क्रिकेटमा ऐतिहासिक पृष्ठ बाँधेपछि नेपाली क्रिकेटप्रेमीहरूको खुसी दुगुना भएको छ । दसैँको माहोलमा आएको यो जितले उत्सवलाई राष्ट्रिय गौरवको क्षणमा रूपान्तरण गरिदिएको छ ।
१४८ रनको योगफल डिफेन्ड गर्न उत्रिएको नेपाली टोलीले कसिलो बलिङ, उत्कृष्ट फिल्डिङ र जोशिलो कप्तानीको सहारामा १९ रनले जित निकाल्यो । यससँगै नेपालले आईसीसीको पूर्ण सदस्य राष्ट्रविरुद्ध पहिलो पटक जित हात पारेको हो ।
यो जित केवल एउटा खेलमा सीमित छैन । अन्तर्राष्ट्रिय क्रिकेटमा १०४औँ खेलमा आएर आएको यो सफलता नेपाली क्रिकेटको दशकौँको संघर्ष, धैर्यता र समर्पणको प्रतिफल हो ।
दश वर्षअघिसम्म एसोसिएट राष्ट्रका रूपमा अवसर खोज्दै हिँडेको नेपाल आज वेस्ट इन्डिजजस्तो दुई पटकको विश्वच्याम्पियनलाई हराउँदै नयाँ उचाइमा पुगेको छ ।
खेलमैदानमा कप्तान रोहित पौडेलको नेतृत्व निर्णायक रह्यो । ब्याटिङमा ३८ रन योगदान गरेका उनले बलिङमा पनि विकेट लिँदै रणनीतिकरूपमा बलरहरूको प्रयोग गरे । खेलपछि उनले “यो जित हाम्रो सामूहिक आत्मविश्वासको उपज हो” भन्दै समर्थकहरूलाई निरन्तर साथ दिन आग्रह गरे ।
यस जितले केवल अंक तालिकामा विजय थपेको छैन, नेपाली क्रिकेटप्रति अन्तर्राष्ट्रिय समुदायको दृष्टिकोणलाई पनि फेरि लेखेको छ । लामो समयसम्म ‘एसोसिएट’ परिचय भोगेको नेपाल अब बलियो प्रतिस्पर्धीका रूपमा उभिनसक्ने संकेत दिएको छ ।
दशैँमा जनतालाई खुसी दिने सामान्यतया परिवार र संस्कृतिको जमघट हो । तर यसपटक नेपाली क्रिकेट टोलीले मैदानमै उत्सव सृजना गर्यो-जहाँ बल, ब्याट र जोशले एउटै सन्देश दियो : नेपाल अब डराउने राष्ट्र होइन, चुनौती दिनसक्ने राष्ट्र हो ।
