दुर्घटनाबाट जोखियो बुद्ध एयरको जहाज
काठमाडौं । काठमाडौंको त्रिभुवन अन्तर्राष्ट्रिय विमानस्थलबाट ७३ यात्रु लिएर विराटनगरका लागि उडेको बुद्ध एयरको जहाज दुर्घटनाबाट जोखिएको छ ।
ल्यान्डिङ गियर (अवतरण गर्ने प्रविधि) मा समस्या आएपछि जहाज अवतरण नगरेर काठमाडौं फर्किएको छ । काठमाडौं फर्किएरपनि समस्या यथावत भएपछि जहाज केही समय काठमाडौंकै आकाशमा घुमिरह्यो। महानिर्देशक प्रतापबाबु तिवारीले भने,“ काठमाडौं फर्किएरपनि २४ मिनेट भन्दा बढी समय जहाज आकासमा होल्ड भयो ।”
बिहान ८ बजेर ३३ मिनेटमा काठमाडौंबाट विराटनगरका लागि उडेको बुद्ध एयरको अल्फा नोभेम्बर इन्डिया जहाज विराटनगरको आकाशमा दुई फन्को लगाएर काठमाडौं फर्किएको थियो। जहाजमा २ बालक, ३ शिशुसहित ७३ जना यात्रु थिए ।
आकाशमा झन्डै १० फन्को लगाएको जहाज त्रिभुवन अन्तर्राष्ट्रिय विमानस्थलमा १० बजेर १६ मिनेटमा सुरक्षित रूपले अवतरण गरिएको तिवारीले जानकारी दिए । जहाज अवतरण भएपछि यात्रुलाई परामर्श गरेर इच्छा अनुसार कसैलाई घर फकाइएको थियो भने कसैलाई फेरि गन्तब्यमा पठाइएको थियो ।