जनमत पार्टीका नेता राउतको हत्या हुन सक्ने मन्त्री रेणु यादवको चेतावनी
काठमाडौं– भौतिक पूर्वाधार तथा यातायात मन्त्री रेणु यादवले जनमत पार्टीका नेता डा. सीके राउतलाई हत्या हुन सक्ने चेतावनी दिएकी छिन् ।
जनमत पार्टी अहिले मधेसका जिल्लाहरूमा किसान आन्दोलन चर्काइ रहेको छ ।
आन्दोलनका क्रममा सो पार्टीले संघीय सरकारका साथै मधेश प्रदेश सरकारलाई निरन्तर तारो बनाइरहेको छ ।
२ माघमा एक कार्यक्रममा सहभागी हुन गइरहेका बेला जनमत पार्टीका कार्यकर्ताहरूले जसपा अध्यक्ष उपेन्द्र यादव, संघीय सरकारकी भौतिक पूर्वाधारमन्त्री रेणु यादव, मुख्यमन्त्री लालबाबु राउतलाई कालो झन्डा देखाएर विरोध गरे ।
बुधबार बलिदानी दिवसको अवसरमा आयोजित कार्यक्रममा भाग लिन भौतिक पूर्वाधारमन्त्री रेणु यादव रौतहटको गौर पुगेकी थिइन् । उनले त्यहाँ पनि जनमत पार्टीको विरोधको सामना गर्नुप¥यो।
बलिदानी दिवसको अवसरमा गौरमा आयोजित कार्यक्रममा मन्त्री रेणु यादवले जनमत पार्टीका अध्यक्ष सिके राउतको हत्या हुनसक्ने चेतावनी दिन पुगिन । गौरमा भएको नरसंहार स्मरण गराउँदै उनले राउतको हत्या हुनसक्ने चेतावनी दिएकी हुन् ।
राउतप्रति आक्रोशित मन्त्री यादवले अर्को गौर नरसंहार मच्चाउने चेतावनी दिइन्।
तत्कालीन मधेसी जनअधिकार फोरम र नेकपा माओवादीबीच २०६३ सालमा भीडन्त हुँदा २७ जना माओवादी कार्यकर्ताको ज्यान गएको थियो ।
गौरको त्यो घटना सम्झाउँदै उनले सिके राउतले फणा उठाए त्यही हालत हुने भनिन् ।
हिन्दीमा भाषण गरेकी मन्त्री यादवले ‘तुफान’ सँग टकराउने प्रयास गरे सिके राउत पनि मारिनसक्ने बताइन् ।
उनको भनाइ छ “राइस मिल अहिले पनि जिवीतै छ । गौरमा फणा देखाउने प्रयास नगरे हुन्छ । यहाँ लाठी भाँच्न मानिसले जानिसकेका छन् । तुफानसँग टकराउने प्रयास नगर । यो गौर ऐतिहासिक जिल्ला हो ।
मन्त्री यादवले जनमत पार्टीका अध्यक्ष राउतको नामै लिएर राइस मिलको इतिहास बिर्से हत्या हुनसक्ने चेतावनी दिइन् ।
“त्यो इतिहास डाक्टर साहेबले नभुलुन् नभए तपाईंको कार्यकर्ता मारिन्छन्, तपाईंलाई पनि घेराबन्दी गरेर मारिदिन्छन् ” हिन्दी भाषामा बोलिएको भिडियोमा यस्तो सुनिन्छ । भिडियोमा यादवले भनेको सुनिन्छ “ हत्या हुन्छ, सतर्क रहनुस्। डाक्टरसाहबलाई म चेतावनी दिन्छु, यदि कलेजोमा ताकत छ, गाई भैंसीको दूध खानुभएको छ भने सिंहदरबार गएर घेर्नुस् । तर जसको नसामा गाई र भैंसीको दूधको रगत बगेको छ, यसलाई फासफुस कहिल्यै लिनु हुँदैन। लड्ने प्रयास नगर्दा बेस हुन्छ।”
