जेनजी आन्दोलन छानबिन : आयोगले ओलीलगायत उच्च अधिकारीको बयान दसैँपछि लिने
काठमाडौँ । भदौ २३–२४ मा भएको जेनजी आन्दोलनका घटनाको छानबिन गर्न गठित गौरीबहादुर कार्की नेतृत्वको आयोगले तत्कालीन प्रधानमन्त्री केपी शर्मा ओली, तत्कालीन गृहमन्त्री रमेश लेखकसहित उच्च पदस्थ अधिकारीहरूको बयान दसैँपछि लिने तयारी गरेको छ ।
आयोगले छानबिनलाई प्रभावकारी बनाउन उनीहरूको विदेश यात्रा तत्कालका लागि रोक्ने निर्णय गरेको छ । साथै, आयोगको अनुमति बिना उनीहरूले उपत्यका छाड्न नपाउने व्यवस्था पनि गरिएको आयोग स्रोतले जनाएको छ ।
जेनजी आन्दोलनको पहिलो दिन १९ प्रदर्शनकारीको मृत्यु भएको थियो भने दोस्रो दिन सरकारी तथा निजी सम्पत्तिमा आगजनी, तोडफोड र लुटपाट भएका थिए । दुई दिनको घटनामा प्रहरीका अनुसार ७४ जनाको ज्यान गएको थियो ।
पूर्व प्रधानन्यायाधीश सुशीला कार्कीको संयोजकत्वमा बनेको तीन सदस्यीय आयोगले थप विज्ञ र जनशक्ति आवश्यक रहेको भन्दै सरकारसँग माग गरिसकेको छ ।
यता, तत्कालीन प्रधानमन्त्री ओली नेतृत्वको नेकपा एमालेले आयोगले राहदानी रोक्ने निर्णयप्रति आपत्ति जनाएको छ। एमालेले यसलाई ‘राजनीतिक पूर्वाग्रहयुक्त कदम’ भनेको छ ।
