देश प्रतिक्रान्तितर्फ धकेलिएको छ, रोकिएन भने बर्बादीतर्फ जान्छ-अध्यक्ष ओली
ललितपुर । नेकपा (एमाले) का अध्यक्ष केपी शर्मा ओलीले देश प्रतिक्रान्तितर्फ धकेलिएको भन्दै गम्भीर चेतावनी दिएका छन् । बुधबार ललितपुरको भनिमण्डलस्थित रामबाग महलमा सुरू भएको एमाले केन्द्रीय कमिटीको बैठकलाई सम्बोधन गर्दै उनले भने, “यदि हामीले प्रभावकारी ढंगले रोक्न सकेनौँ भने देश त्यतातिर धकेलिएको छ र बर्बादीतर्फ जान्छ।”
ओलीले हालको राजनीतिक परिस्थितिलाई लोकतान्त्रिक मूल्य र जनपक्षीय प्रणालीका लागि खतराको संकेतका रूपमा चित्रण गर्दै त्यसलाई अविलम्ब सुधार्नुपर्ने बताए । उनले भने, “देशलाई लोकतान्त्रिक, जनपक्षीय, शान्तिपूर्ण र सुशासनयुक्त बाटोमा फर्काउनुपर्नेछ, नत्र गम्भीर संकट निम्तिनेछ।”
अध्यक्ष ओलीले हालैको ‘जेन–जी आन्दोलन’ प्रति पनि संकेत गर्दै ती घटनाहरू आकस्मिक नभई लामो प्रयत्नको परिणाम भएको टिप्पणी गरे । उनले भने, “यत्रो घटना कसरी भयो भन्ने प्रश्न उठ्छ, तर प्रयास त धेरै अघि नै थालिएको थियो, केवल रोक्न सकिएन।”
लोकतन्त्रको रक्षामा जनताको भूमिका जोड्दै ओलीले भने, “लोकतन्त्र राज्यले होइन, जनताले ल्याएका हुन् । त्यसैले जनताले नै यसको रक्षा गर्नुपर्छ।”
राम्रा नीति र राष्ट्रहितकै कारण प्रहार
एमाले अध्यक्ष ओलीले पार्टीमाथि भइरहेका आक्रमण र आलोचनाको कारण पार्टीका राम्रा नीति र राष्ट्रहितप्रतिको अडान भएको दाबी गरे ।
उनले भने, “हाम्रा नीतिहरू राम्रा भएकै कारण हामीमाथि प्रहार भइरहेको छ । हामी न्याय र राष्ट्रिय हितका पक्षमा उभिएका छौँ, यही कुरा धेरैलाई मन परेको छैन।”
उनले आफ्नो पार्टी सरकारबाट अस्थायी रूपमा मात्र बाहिरिएको बताउँदै भने, “एकछिनका लागि सरकारबाट बाहिरिँदा स्थायी रूपमा हटेको भनेर भ्रममा नपर्नुहोस् । देशका लागि नेकपा एमाले आवश्यक छ।”
पार्टीभित्रैबाट असहयोग भयो
ओलीले सरकारमा हुँदा पार्टीभित्रैबाट असहयोग र खुट्टा तान्ने प्रवृत्ति भएको गुनासो दोहोर्याए । उनले उदाहरण दिँदै भने, “हुलाकी राजमार्गदेखि बेनी–जोमसोम–कोरला नाका निर्माण जस्ता राष्ट्रिय महत्वका कामहरू अघि बढाइरहेका थियौँ, तर पार्टीभित्रैबाट असफल बनाउने प्रयास भयो ।” तर, उनले असहयोग गर्नेहरूको नाम भने खुलाएनन् ।
‘महाधिवेशन मंसिर अन्त्यतिर’
जेन–जी आन्दोलनपछि पहिलोपटक सार्वजनिक रूपमा बैठकमा सहभागी भएका ओलीले केन्द्रीय कमिटी बैठकमा राजनीतिक प्रतिवेदन पेश गरेका छन् । बैठकले सचिवालयले सिफारिस गरेको मंसिर अन्तिम साता ११औँ महाधिवेशन गर्ने प्रस्ताव अनुमोदन गर्ने तयारी गरेको छ ।
ओलीको आजको सम्बोधनले देशको वर्तमान राजनीतिक दिशाप्रति गम्भीर चिन्ता र पार्टीभित्र एकताको खाँचो दुवै प्रकट गरेको छ । उनले जेन–जी आन्दोलनलाई ‘लामो योजनाको परिणाम’ भनेका छन् भने लोकतन्त्रको रक्षा जनतामार्फत् मात्र सम्भव हुने बताएका छन् ।
