राजनीतिक शक्ति प्रदर्शनका बीच काठमाडौँमा सुरक्षा संवेदनशीलता बढ्यो
काठमाडाैँ । नेकपा एमालेले गठन गरेको नेशनल भोलेन्टियर फोर्स (एनभीएफ) ले शुक्रवार काठमाडौँमा गरेको प्रदर्शनले राजधानीको राजनीतिक गतिविधि मात्र बढाएन, सुरक्षा संवेदनशीलतालाई पनि असामान्य रूपले तान्यो ।
पार्टीको आन्तरिक संरचनालाई संस्थागत गर्न भन्दै फोर्सले विभिन्न ठाउँबाट र्याली निकालेर राजधानीका मुख्य सडकहरूमा उपस्थित जनाएपछि काठमाडौं प्रहरीले विशेष सतर्कता अपनाएको छ।
सामाखुशी र जावलाखेलबाट अलग–अलग समूहमा निस्किएको फोर्सले बबरमहल हुँदै माईतीघर र बानेश्वर क्षेत्रमा मार्चपास गरेपछि प्रमुख चोकहरूमा ट्राफिक र सुरक्षा दबाब एकैसाथ बढेको थियो।
साधारण प्रदर्शनभन्दा फरक रूपमा, फोर्सले आफूलाई संयोजनबद्ध राजनीतिक स्वेच्छिक संरचना का रूपमा प्रस्तुत गरेको देखिएपछि सुरक्षा निकायले त्यसको स्वरूप, उद्देश्य र सम्भावित प्रभावबारे थप ध्यान दिएको हो।
यसैबीच, पार्टीले आजै काठमाडौंस्थित एक होटलमा फोर्सको केन्द्रिय कमाण्ड घोषणा गर्न लागेको छ, जसमा अध्यक्ष केपी शर्मा ओलीको उपस्थिति रहनेछ।
शीर्ष नेताको सहभागिताले कार्यक्रममा उच्च राजनीतिक प्रतीकात्मकता थपिने अपेक्षा गरिएको छ। ओलीको उपस्थितिलाई ध्यानमा राख्दै सुरक्षाकर्मीहरूको संख्या बानेश्वर–नयाँबानेश्वर क्षेत्रदेखि कार्यक्रमस्थल वरपरसम्म उल्लेख्य रूपमा बढाइएको छ।
राजधानीले पछिल्ला वर्षमा राजनीतिक ¥याली, माइतीघर प्रदर्शन र शक्ति प्रदर्शनहरूलाई बारम्बार सामना गर्दै आएको छ, तर स्वयं पार्टीले गठन गरेको ‘स्वेच्छिक फोर्स’ सडकमा उत्रनुले भोलिका दिनमा राजनीतिक संगठनहरूले प्रयोग गर्न सक्ने संरचनाप्रतिको बहसलाई चर्काउने देखिन्छ।
सुरक्षा निकायका अधिकारीहरू अनौपचारिक रूपमा स्वीकार्छन्—राजनीतिक दलका आन्तरिक मोर्चा सडकमा प्रकट हुँदा प्रशासनलाई ‘कानूनी र व्यवस्थापन’ दुवै पक्ष सन्तुलित राख्न कठिनाइ बढ्ने गर्दछ।
एमालेले फोर्सलाई पार्टीभित्रको नीति तथा नेतृत्व सुरक्षा संरचना का रूपमा व्याख्या गरे पनि यसले राजनीतिक प्रतिस्पर्धा, भीड व्यवस्थापन र सुरक्षा समन्वयमा नयाँ प्रकारको चुनौती उत्पन्न गर्न सक्ने संकेत अहिले नै देखिन थालेको छ। राजधानीमा शुक्रबार देखिएको असमान्य सुरक्षा उपस्थिति त्यसैको प्रारम्भिक संकेतका रूपमा हेरिएको छ।
