प्यूठानमा भदौ १५ गतेसम्म सार्वजनिक तथा निजी यातायात पूर्ण रुपमा बन्द गर्ने निर्णय
प्रकाशित मिति : 18 August, 2020 4:56 pm
प्यूठान, २ भदौ ।
प्यूठानमा आज राति १२ बजेदेखि सार्वजनिक तथा निजी यातायात पूर्ण रुपमा बन्द गर्ने निर्णय भएको छ ।
प्रमुख जिल्ला अधिकारी खिमराज भुसालका अध्यक्षतामा आज बसेको कोभिड संकट व्यवस्थापन समितिको बैठकले भदौ १५ गतेसम्म सार्वजनिक तथा निजी सवारीसाधन पूर्ण रुपमा बन्द गर्ने निर्णय गरेको हो ।
कोरोना संक्रमण दर बढी भएका जिल्लाका व्यक्तिको आवातजावत प्यूठानमा बढी हुन थालेको भन्दै यातायात बन्द गर्न थालिएको जिल्ला प्रशासन कार्यालय प्यूठानका सहायक प्रमुख जिल्ला अधिकारी गौरव पन्थीले जानकारी दिए ।
अत्यावश्यकबाहेक अन्य सवारीसाधन पूर्ण रुपमा बन्द हुनेछन् । चाडपर्वका समयमा व्यक्तिको आवतजावत बढी हुने भएकाले यही भदौ १५ गतेसम यातायात बन्द गर्ने निर्णय गरिएको उनको भनाई छ ।