एम्बाप्पेको दुई गोलमा पीएसजीको सहज जित
प्रकाशित मिति : 4 September, 2022 9:17 am
काठमाडौं । केलियन एम्बाप्पेको दुई गोलमा फ्रेन्च लिग वान फुटबलमा पेरिस सेन्ट जर्मेन (पीएसजी) ले नान्तेसमाथी सहज जित हात पारेको छ ।
शनिबार राती भएको पीएसजीले ३–० गोल अन्तरले हराएको हो । पीएसजीको जितमा केलियन एमबाप्पेले दुई गोल गर्दा नुनो मेन्डिसले एक गोल गरे ।
नान्तेसको घरेलु मैदानमा भएको खेलको १८ औं मिनेटमा एमबाप्पेको गोल मार्फत पीएसजीले सुरवाती अग्रता लिएको थियो । खेलको २४ औं मिनेटमा नान्तेस फाबियोले रातो कार्ड पाएर बाहिरिएपछि १० खेलाडीमा समेटिएको नान्तेसले खेलमा लय समाउन सकेन् ।
खेलको ५४ औं मिनेटमा एमबाप्पेले व्यक्तिगत दोस्रो गोल गर्दै पीएसजीको अग्रता दोब्बर पारे । त्यस्तै ६८ औं मिनेटमा नुनोले गोल गर्दै पीएसजीलाई ३–० को जित दिलाए ।
जितसँगै पीएसजीले ६ खेलमा १६ अंक जोडेर शीर्ष स्थानमा यथावत रहेको छ । पराजित नान्तेस ६ अंक जोडेर दशौँ स्थानमा छ ।
