बसमा करेन्ट : बाउ बचाउन जाँदा छोराले पनि ज्यान गुमाए
दाङ । दाङको तुल्सीपुरबाट बस रोल्पा गंगादेव गाउँपालिकाको दलसिंगे जाँदै थियो ।
गएरातिको हावाहुरी र पानीले सडक छेउमा रहेको बिजुलीको तारमा रुख ढलेको थियो । रोल्पातिर जाँदै गरेको बस सडक पार गर्दै गर्दा बिजुलीको तारमा छोइयो ।
बसमा करेन्ट लागेको थाहा पाएपछि सबै यात्रु बाहिर निस्किए तर बसमै सवार कालुराम डाँगीले बसमा रहेको फलामको डण्डी समाए । डण्डी समाएपछि उनलाई करेन्ट लाग्यो ।
छोरा टोपलाल डाँगी सुरक्षित तरिकाले बाहिर निस्किसकेका थिए । बाउलाई करेन्ट लागेको थाहा पाएपछि उनी बचाउन भन्दै गए । टोपलालाई पनि करेन्ट लाग्यो ।
कपुरकोट गाउँपालिका वडा नम्बर ३ का वडाअध्यक्ष प्रदीप खड्काले भने,“ बसमा करेन्ट लागेको थाहा पाएपछि निस्कदै गर्दा बाउले फलामको डण्डी समाउनुभएछ । उहाँलाई करेन्ट लाग्यो । बाउलाई बचाउन जाँदा छोराको पनि मृत्यु भयो । ”
सल्यान कपुरकोट गाउँपालिकाको वडा नम्बर-३ चोरखोलामा तारले बसमा छुँदा करेन्ट लागेको थियो । रा १ ख ८३४ नम्बरको बसमा ३३ के.भी. प्रसारण लाईनको पोलको तारमा बसले छुँदा २ जनाको मृत्यु भएको हो ।
घटनामा बसका मालिक घाइते भएका छन् । अन्य यात्रु भने सकुसल रहेको अध्यक्ष खड्काले जानकारी दिए ।
