फ्लाई दुबईका कन्ट्री म्यानेजर र एयरपोर्ट म्यानेजरलाई त्रिभुवन अन्तराष्ट्रिय विमानस्थल प्रवेशमा रोक
काठमाडाैँ । नागरिक उड्ययन प्राधिकरणले फ्लाई दुबईका कन्ट्री म्यानेजर र एयरपोर्ट म्यानेजरलाई त्रिभुवन अन्तराष्ट्रिय विमानस्थल प्रवेशमा रोक लगाएको छ ।
दुबै जनालाई विमानस्थल प्रवेशमा रोक लगाउँदै प्रवेश पास समेत निस्कृय पारिएको प्राधिकरणले जनाएको छ ।
हिजो राति काठमाडौँ-दुबइ उडानमा चरा ठोक्किएको भन्दै भ्रमपूर्ण सूचना फैलाएको भन्दै कन्ट्री म्यानेजर र एयरपोर्ट म्यानेजरलाई विमानस्थल पास निष्कृय बनाउँदै प्रवेश पासमा रोक लगाइएको प्राधिकरणले जनाएको छ ।
हिजो राति काठमाडौँबाट दुबईका लागि उडेको जहाजमा आगोको झिल्को देखिएको थियो ।
जहाज उडेलगत्तै ठुलो आवाजसहित आगोको झिल्का देखिए पनि विमान गन्तव्यतर्फ लागेको थियो ।
फ्लाई दुबईले जहाजमा चरा ठोक्किए पनि सकुशल दुबईमा अवतरण गरेको जनाएको थियो ।
प्राधिकरणले यसको खण्डन गर्दै यसबारे कुनै प्रमाण नभेटिएको बताएको छ । जहाज कम्पनीको भनाई आएसँगै प्राधिकरणले कारबाही प्रकृया अगाडि बढाएको हो ।
