उच्च तहका नेताको सम्पत्ति छानबिन गर्न कानुनमन्त्री गुरुङको माग
काठमाडौँ । नेपाली काँग्रेसका उपसभापति एवं कानुन, न्याय तथा संसदीय मामिलामन्त्री धनराज गुरुङले उच्च तहका नेताहरूको सम्पत्ति छानबिन गर्नुपर्ने बताएका छन् । उनले आयोग गठन गरेरै नेताहरूको सम्पति छानबिन गर्नुपर्नेमा जोड दिएका हुन् ।
काठमाडौंमा आज आयोजित एक कार्यक्रमलाई सम्बोधन गर्दै मन्त्री गुरुङले राजनीतिक दलका उच्च तहका नेताहरूको सम्पत्ति विवरण छानबिन गर्न पार्टीभित्रबाटै सरकारसँग आग्रह गर्नुपर्ने बताए ।
उनले उच्च तहका नेताहरूको सम्पत्ति छानबिन गरी रुपान्तरणको अभियान शुरु गर्नुपर्नेमा जोड दिए । भ्रष्टाचारका ठूला ठूला काण्डहरूको फाइल खोल्दै अनियमितता गर्नेलाई कानूनी कठघरामा उभ्याउने बताए ।
निष्ठा, विचार र सिद्धान्तको कुरामा मन्त्री पदको पर्वाह नरहेको बताए ।
उनले भने,“ धनराज गुरुङ यदी फरक काँग्रेस हो, शेखर कोईराला यदी फरक काँग्रेस हो भने हामीले भन्नैपर्छ । पहिला हाम्रो सम्पत्ति छानबिन गरेर देखाउ सरकार भन्न सक्नुपर्छ । छानबिन समिति आयोग गठन गर भन्नुपर्छ म आफैँ सरकारमा छु । म भन्दैछु ।”
मन्त्री गुरुङले ढिलोचाँडो उच्च तहका नेताहरूको सम्पति छानबिन हुने दाबी गरे । उनले भने,“अब भन्नैपर्छ की नेपाल सरकारले सायद ढिलो चाँडो म पनि मन्त्री छु, सुझाव दिएकै छु । ढिलो चाँडो उच्च तहका नेताहरूको सम्पत्ति छानबिन आयोग गरेरै छोडिन्छ, कसैलाई छोडिँदैन ।”
उपसभापति गुरुङले रुपान्तरणको नाममा अहिले नै पार्टी सभापति परिवर्तन गर्ने भन्ने पक्षमा आफू नरहेको र १५ औं अधिवेशनबाट पार्टी नेतृत्व रुपान्तरण हुने बताए ।
